ލެގޯ އަކީ ކުޑަކުދިން އިމާރާތާއި ތަންތަން އަޅަން ބޭނުންކުރާ އެކިއެކި ކުލަކުލައިން އުފައްދާފައިވާ ޕްލާސްޓިކް ގާތަކެއް. ލެގޯ ޕްލާސްޓިކް ބްރިކްސް ބޭނުންކޮށްގެން ކުޑަކުދިން ވަރަށް ފަސޭހައިން ޓަވަރުތަކާއި ގެތަކާއި އެނޫން ވެސް އެކި ތަންތަން ހަދާ.

ކުރީ ސަރުކާރުން އެޅި ފްލެޓްތައް ބަހަން ނޭނގުނު ބަޔަކަށް "ލެގޯ" އިން ވެސް ފްލެޓެއް ނޭޅޭނެ ކަމަށް ވިދާޅުވެ، ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހު ޖަމާލް ސަރުކާރަށް ފާޑުވިދާޅުވެއްޖެ އެވެ.

މާދަމާ އޮތް ލޯކަލް ކައުންސިލް އިންތިހާބުގެ ކެމްޕެއިން ނިންމާލުމަށް ރޭ އއ. ރަސްދޫގައި ބޭއްވި ރަސްމިއްޔާތުގައި ވާހަކަދައްކަވަމުން ރައީސް އިބްރާހިމް މުހައްމަދު ސޯލިހު ވަނީ ސަރުކާރުގެ މިހާރުގެ އަމާޒަކީ 13،000 ހައުސިން ޔުނިޓް އެޅުން ކަމަށް ވިދާޅުވެފަ އެވެ.

މިކަމާގުޅިގެން ސަރުކާރަށް ފާޑުވިދާޅުވެ މަލީހް ވިދާޅުވީ ޕީޕީއެމް ސަރުކާރުން އަޅާ ނިންމާފަހުރި ފްލެޓް ބަހަން ނޭނގުނު ބަޔަކަށް "13،000 ލެގޯ ފްލެޓް ވެސް،" ނޭޅޭނެ ކަމަށެވެ.

ލެގޯ އަކީ ކުޑަކުދިން އިމާރާތާއި ތަންތަން އަޅަން ބޭނުންކުރާ އެކިއެކި ކުލަކުލައިން އުފައްދާފައިވާ ޕްލާސްޓިކް ގާތަކެކެވެ. ލެގޯ ޕްލާސްޓިކް ބްރިކްސް ބޭނުންކޮށްގެން ކުޑަކުދިން ވަރަށް ފަސޭހައިން ޓަވަރުތަކާއި ގެތަކާއި އެނޫން ވެސް އެކި ތަންތަން ހަދަ އެވެ.

މަލީހް ވިދާޅުވީ ވެރިކަމަށް 1،125 ދުވަސް ވީއިރު މިސަރުކާރަށް އެޅުނު ފްލެޓްގެ އަދަދަކީ 0 ކަމަށާއި އަދި އެމްޑީޕީ ސަރުކާރު ނިމެން ބާކީ އޮތީ އެންމެ 700 ދުވަސްކަމަށް ވިދާޅުވެ، 13،000 ފްލެޓް އެޅުމަކީ ނުވާނެ ކަމެއް ކަމަށް ދޭހަވާނޭހެން ވާހަކަދައްކަވާފަ އެވެ.

ކޮމިއުނިކޭޝަން މިނިސްޓަރު ކަމުން މަލީހް ވަކިކުރެވުނު ފަހުން އެ ބޭފުޅާ ފާހަގަވެފައި ވަނީ ސަރުކާރަށް ވަރަށް ބޮޑަށް ފާޑުވިދާޅުވާ ބޭފުޅެއްގެ ގޮތުގަ އެވެ.

މަލީހަށް މަގާމުގެ މައްސޫލިއްޔަތު އަދާނުކުރެވޭ ކަމަށް ބުނެ މަޖިލީހަށް މައްސަލަ ހުށަހަޅާފައިވަނީ ވެރިކަންކުރާ ޕާޓީ ކަމަށްވާ އެމްޑީޕީންނެވެ.

އެހެން ނަމަވެސް، މަގާމުން ވަކިކުރުން މަލީހް ސިފަކުރައްވާފައި ވަނީ މަޖިލީހުގެ މެމްބަރުންނަށް ފާޑުވިދާޅުވެ، ޓީވީ ޕްރޮގްރާމެއްގައި އެބޭފުޅާ ދެއްކި ވާހަކަ ހަޖަމް ނުކުރެވިގެން ދެއްވި ނުހައްގު އަދަބެއްގެ ގޮތުގަ އެވެ.