އިލެކްޝަންސް ކޮމިޝަނަށް އިތުބާރު އެބައޮތްކަމަށް އެމްޑީޕީގެ ޗެއާޕާސަން ހަސަން ލަތީފް ވިދާޅުވެއްޖެ އެވެ.

މިމަހުގެ 10 ވަނަ ދުވަހު ބޭއްވުނު ލޯކަލް ކައުންސިލް އިންތިހާބާއި ގުޅިގެން ފާހަގަކުރެވުނު ބައެއް މައްސަލަތައް އީސީއަށް ހުށަހެޅުމަށްފަހު އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ލަތީފް ވިދާޅުވީ، މިހާތަނަށް އީސީ އިން ގާނޫނާ ހިލާފު އަމަލެއް ހިންގި މަންޒަރު ފެނިވަޑައިގެންފައި ނުވާ ކަމަށެވެ. އަދި އެފަދަ މަންޒަރެއް ނުފެންނަހާ ހިނދަކު އެމްޑީޕީގެ އިތުބާރު އެ ކޮމިޝަނަށް އޮންނާނެ ކަމަށް އޭނާ ވިދާޅުވި އެވެ.

"އިލެކްޝަންސް ކޮމިޝަނަށް އިތުބާރު ނުކުރަންވީ ސަބަބަބެއް އަދިއެއް ނެތް. އަޅުގަނޑުމެންނަކަށް އަދިއެއް ނުފެނޭ އިލެކްޝަންސް ކޮމިޝަނަކުން ގާނޫނާ ހިލާފަށް އެއްވެސް ކަމެއް ކުރާ ތަނެއް،" ލަތީފް ވިދާޅުވި އެވެ.

އެހެން ނަމަވެސް، އެ ކޮމިޝަނަށް މައްސަލައެއް ހުށަހެޅުމުން އެމައްސަލަ ބަލައިދޭން ޖެހޭނެކަމަށް ދެކޭކަމަށް އޭނާ ވިދާޅުވި އެވެ.

"އަޅުގަނޑުމެން މި ދަންނަވާ ވާހަކައަކީ މިސާލަކަށް ވޯޓު ކަރުދާސް ބާތިލްވީ ގޮތް ބަލައިދޭން އެދުނީމާ ދެން އެއީ އެބޭފުޅުން ބައްލަވައިދޭން ޖެހޭ ކަމެއް ކަމަށް އަޅުގަނޑުމެން ދެކެނީ."

އެމްޑީޕީއިން އީސީއަށް ނުފޫޒު ފޯރުވާކަމަށް ކުރާ ތުހުމަތުތަކާ ބެހޭގޮތުން ލަތީފް ވިދާޅުވީ އެޕާޓީއިން އީސީއަށް ނުފޫޒު ފޯރުވާފައި ނުވާނެކަމަށާއި އަދި ނުވެސް ފޯރުވާނެ ކަމަށެވެ.

އެމްޑީޕީއިން ވަނީ، ހަ ވޯޓުފޮއްޓެއް އަލުން ގުނައިދިނުމަށް އެދި އިލެސްޝަންސް ކޮމިޝަނަށް މިއަދު ހުށަހަޅާފަ އެވެ.