އިންޑިއާގެ މުމްބާ: މިދިޔަ ޑިސެމްބަރު މަހުން ފެށިގެން ވެސްޓް ބެންގާލް ސްޓޭޓުން ނުރައްކާތެރި ނިޕާ ވައިރަހުގެ ދެ ކޭސް ފެނުމާ ގުޅިގެން، އެ ބަލި ފެތުރުން "ވަގުތުން ކޮންޓްރޯލްކޮށްފައިވާ" ކަމަށް އިންޑިއާގެ ކަމާބެހޭ ފަރާތްތަކުން ބުނެފި އެވެ.

ކުރިން ލިބުނު ރިޕޯޓްތައް ބުނާގޮތުން ފަސް ކޭސްއެއް ފެނިފައިވެ އެވެ.

ޖަނަވާރުންގެ ފަރާތުން އިންސާނުންނަށް ފެތުރޭ ނިޕާ ވައިރަހަށް ވެކްސިނެއް ނެތްއިރު، ދުނިޔޭގެ ސިއްހަތު ޖަމިއްޔާ (ޑަބްލިއު.އެޗް.އޯ) އިން ބުނާ ގޮތުގައި މި ބަލީގައި މަރުވާ މީހުންގެ ނިސްބަތް ހުރީ 40 އިން 75 އިންސައްތައާ ދެމެދުގަ އެވެ.

"ބަލި ދެނެގަތުމަށް ކުރެވޭ މަސައްކަތްތަކާއި، ލެބޯޓްރީ ޓެސްޓުތަކާއި، އަދި ފީލްޑް އިންވެސްޓިގޭޝަންތައް ވަނީ އިތުރުކުރެވިފައި. މީގެ ސަބަބުން ބަލި ފެތުރުން ވަގުތުން ކޮންޓްރޯލްކުރެވުނު،" އިންޑިއާގެ ހެލްތު މިނިސްޓްރީން ނެރުނު ބަޔާނެއްގައި ބުނެފައިވެއެވެ.

ބަލި ޖެހުނު ދެ މީހުންނާ ބެހޭ އިތުރު ތަފްސީލެއް އެ މިނިސްޓްރީން ހާމައެއް ނުކުރެ އެވެ.

"ހާލަތު ދަނީ މެދުނުކެނޑި މޮނިޓަރ ކުރަމުން، އަދި އާންމު ސިއްހަތު ރައްކާތެރިކުރުމަށް އަޅަންޖެހޭ ހުރިހާ ފިޔަވަޅެއް ވަނީ އަޅާފައި،" އެ ބަޔާނުގައި އިތުރަށް ބުނެފައިވެއެވެ. އަދި ބަލިޖެހުނު މީހުންނާ ކޮންޓެކްޓްވި 196 މީހަކު ދެނެގަނެވިފައިވާ ކަމަށާއި، އެ އެންމެންވެސް ބައްޔަށް ނެގެޓިވް ކަމަށް ބުނެފައިވެ އެވެ.

ނިޕާ ވައިރަސް އެންމެ ފުރަތަމަ ފެނިފައިވަނީ 1998 ވަނަ އަހަރު މެލޭޝިއާގެ އޫރު ގެންގުޅޭ މީހުންގެ މެދުގައި ބަލި ފެތުރުމާ ގުޅިގެންނެވެ.

އިންޑިއާގައި ނިޕާ ވައިރަސް އެންމެ ފުރަތަމަ ފެނިފައިވަނީ 2001 ވަނަ އަހަރު ވެސްޓް ބެންގާލްއިންނެވެ.

2018 ވަނަ އަހަރު ކެރެލާގައި ނިޕާ ވައިރަސް ޖެހިގެން މަދުވެގެން 17 މީހުން މަރުވިއިރު، 2023 ވަނަ އަހަރުވެސް އެ ސްޓޭޓުން މި ވައިރަސް ޖެހިގެން ދެ މީހަކު މަރުވެފައިވެ އެވެ.

މި ބަލީގެ އަލާމާތްތަކުގެ ތެރޭގައި ގަދައަށް ހުންއައުމާއި، ހޮޑުލުމާއި، ނޭވާލާ ނިޒާމަށް މައްސަލަ ދިމާވުން ހިމެނެއެވެ. ނަމަވެސް ބަލި ބޮޑުވާ ހާލަތްތަކުގައި ފިޓްޖެހުމާއި ސިކުނޑި ދުޅަވުން ފަދަ ކަންކަން މެދުވެރިވެ، ކޯމާއަކަށް ދިއުން އެކަށީގެންވެ އެވެ.

ވާލަކީ މި ވައިރަސް ގުދުރަތީ ގޮތުން އުފުލާ އެއްޗެކެވެ. އަދި ބަލި ފެތުރެން މެދުވެރިވާ އެންމެ ބޮޑު ސަބަބަކީ ވާލުގެ ފަރާތުން ބަލި ފެތުރުން ކަމަށް ވަނީ ފާހަގަކުރެވިފަ އެވެ.