ކުރިއަށް އޮތް ލޯކަލް ކައުންސިލް އިންތިހާބު އެމްޑީޕީއަށް ކާމިޔާބުނުވެއްޖެ ނަމަ މި ސަރުކާރު ޖަވާބުދާރީ ކުރުމުގެ ފުރުސަތު ރައްޔިތުންނަށް ގެއްލިގެންދާނެ ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމް ވިދާޅުވެއްޖެ އެވެ.

އެމްޑީޕީން ސިލްސިލާކޮށް އެ ޕާޓީގެ ހަރުގޭގައި ބާއްވަމުން އަންނަ ހަރުގެ ޖަލްސާތަކުގެ ތެރެއިން ޖަލްސާއެއްގައި ވާހަކަ ދައްކަވަމުން މީކާއިލް ވިދާޅުވީ، ރާއްޖެއަށް ތަރައްގީ ލިބޭނީ ވެރިކަން ހިންގާ ޕީއެންސީގެ ކެންޑިޑޭޓުން ހޮވައިގެން ކަމަށް ރައީސް މުއިއްޒު ވިދާޅުވަނީ ރައްޔިތުންގެ ލޮލުގައި އަނދުން އަޅުވަން ކަމަށެވެ.

އެމްޑީޕީ އިން އެތައް ގުރުބާނީއެއް ވެގެން ރާއްޖޭގައި ގާއިމުކޮށްފައިވާ ޖަވާބުދާރީ ކުރުވުމުގެ ނިޒާމު ނެގެހެއްޓުމަށް ލިބިގެންދާ މިއީ އެންމެ ފަހުގެ ފުރުސަތު ކަމަށް ވެސް މީކާއިލް ރޭ ވިދާޅުވި އެވެ.

"އެހެންވީމާ. މި އިންތިހާބުގައި އަޅުގަނޑުމެންގެ ކެންޑިޑޭޓުންނަށް. އަޅުގަނޑުމެންގެ ކައުންސިލްތަކަށް މެޖޯރިޓީ ނުލިބިއްޖެ ނަމަ، ތިބޭފުޅުންނަށް މި ސަރުކާރު ކުރިއަށް އޮތް މުސްތަގުބަލުގައި ލިބޭނޭ ފުރުސަތު މި ދަނީ ގެއްލިގެން،" މީކާއިލް ވިދާޅުވި އެވެ.

އެ ފުރުސަތު ގެއްލިގެން ނުދާނެކަން ކަށަވަރު ކުރުމަށްޓަކައި އެމްޑީޕީގެ ހުރިހާ މެންބަރުންނާއި އިސް ވެރިން އެކުގައި ގުޅިގެން މަސައްކަތް ކުރަންޖެހޭ ކަމަށާއި މި އިންތިހާބަކީ މުހިންމު އިންތިހާބެއްގެ ގޮތުގައި ދެކެން ޖެހޭ ކަމަށް ވެސް އޭނާ ވިދާޅުވި އެވެ.

ޖަލްސާގައި ވާހަކަދައްކަވަމުން މީކާއިލް އިތުރަށް ވިދާޅުވީ ބޮޑު ދެ އިންތިހާބު އެއްކޮށްލަން ރައްޔިތުންގެ ފެންނަ ނުފެންނަ ވޯޓެއް ނަގަން ސަރުކާރުން މަސައްކަތް ކުރަމުންދާ ކަމަށާއި އެގޮތުން، މިހާރު މަޖިލީހުގައި އޮތް ބިލު ފާސްކޮށް ލޯކަލް ކައުންސިލް އިންތިހާބާއެކު އެ ވޯޓު ނަގަން ސަރުކާރުން ނިންމާފައިވާ ކަމަށް އޭނާ ވިދާޅުވި އެވެ.

މީކާއިލް ވިދާޅުވީ މި ސަރުކާރުން ކުރަން މިއުޅޭ ކަންކަމަށް ވަރަށް ބޮޑަށް ރައްޔިތުން ފާރަވެރިވުމަށް ގޮވާލައިފަ އެވެ.