އައްޑޫ އަތޮޅުގައި ހަރަކާތާތްތެރިވާ ސްކޫޕް ގްރޫޕަކީ ގޭންގެއް ކަމަށް ކަނޑައަޅައި ދިނުމަށް އެދި ދައުލަތުން ހައިކޯޓަށް ހުށަހެޅި މައްސަލަ، ސިއްރިއްޔާތުގައި ކުރިއަށް ގެންދަން ހައިކޯޓުން ނިންމައިފި އެވެ.

މިދިޔަ އަހަރު ގޭންގްތައް ހުއްޓުވަން ތަންފީޒުކުރަން ފެށި އާ ގާނޫނުގެ ދަށުން ގޭންގެއްގެ ގޮތުގައި ކަނޑައަޅަން ޕްރޮސެކިއުޓާ ޖެނެރަލް (ޕީޖީ)ގެ އޮފީހުން ހުށަހެޅި ފުރަތަމަ ގްރޫޕެއްގެ ގޮތުގައި އައްޑޫގައި ހަރަކާތްތެރިވާ "ސްކޫޕު" ގްރޫޕް ހިމެނެ އެވެ. މި ގުރޫޕް ގޭންގެއްގެ ގޮތުގައި ކަނޑައަޅަން މައްސަލަ ހައިކޯޓަށް ހުށަހެޅީ މިދިޔަ މަހުގެ މެދުތެރޭގަ އެވެ.

އެ މައްސަލަ ބަލާ ހައިކޯޓުގެ ބެންޗު އެ ކޯޓުން އާއްމުކޮށްފައިވާއިރު، ބެންޗުގައި ހިމެނެނީ، ފަނޑިޔާރު މުހައްމަދު ޝަނީޒު އަބްދުﷲ އާއި އަބްދުލް މާނިއު ހުސެއިނާއި އިބްރާހީމް މާހިރެވެ.

އެ މައްސަލަ ރޭ އިބްތިދާއީ ގޮތުން ފަށާފައިވާއިރު، މައްސަލަ އާއްމުކޮށް ހުޅުވާނުލައި ކުރިއަށް ގެންދަން ނިންމި ސަބަބު ހާމައެއް ނުކުރެ އެވެ. އެކަމަކު ހާއްސަ ހާލަތްތަކެއްގައި ޝަރީއަތުގެ މަޖިލިސް ނުވަތަ މަޖިލީހުގެ ބައެއް އާއްމުކޮށް ހުޅުވާ ނުލައި ކުރިއަށް ގެންދިއުމުގެ އިހްތިޔާރު ގާނޫނުން ފަނޑިޔާރަށް ލިބިގެންވެ އެވެ.

ޝަރީއަތް ސިއްރު ކުރެވޭނެ ސަބަބުތަކުގެ ތެރޭގައި އަހްލާގީ މިންގަނޑުތައް ހިފެހެއްޓުމާއި، ގައުމީ ސަލާމަތް ނުވަތަ އަމަން އަމާންކަން ދެމެހެއްޓުމާއި ޝަރީއަތް ހުޅުވާލައިގެން ކުރިއަށް ގެންގޮސްފިނަމަ، ޢަދުލު އިންސާފު ގާއިމުކުރުމަށް ހުރަސްއެޅިދާނެ ފަދަ ހާއްސަ ހާލަތެއް މެދުވެރިވުން ހިމެނެ އެވެ.

ޕީޖީ އޮފީހުން ބުނީ، ސްކޫޕު ގްރޫޕަކީ ގޭންގެއް ކަމަށް ކަނޑައަޅަން ކޯޓަށް ހުށަހަޅަން ނިންމީ ފުލުހުން ހުށަހެޅި ހެކިތައް ދިރާސާކުރުމަށް ފަހުގައި ކަމަށެވެ. އެ ގްރޫޕުގައި ގޭންގެއްގެ ޝަރުތުތައް ފުރިހަމަވާ ކަމަށާއި މިހާރު ވެސް ކުށްކުރުމުގައި ހަރަކާތްތެރިވާ ކަމަށް ޕީޖީ އޮފީހުން ވަނީ ތުހުމަތުކޮށްފަ އެވެ.

އެ ގްރޫޕަކީ ގޭންގެއް ކަމަށް ކަނޑައަޅައި، އެ ގްރޫޕަށް ނިސްބަތްވާ ކަމަށް ފާހަގަކުރެވުނު ނުވަ މީހަކީ އެ ގްރޫޕުގެ މެންބަރުންގެ ގޮތުގައި ކަނޑައަޅައިދޭން ހައިކޯޓުގައި އެދިފައިވާ ކަމަށް ޕީޖީ އޮފީހުން ބުންޏެވެ.

މީގެ އިތުރުން އެ ގްރޫޕަށް ނިސްބަތްވާ ކަމަށް ފާހަގަކުރެވިފައިވާ "އެސް ކޭ ޕީ ސްޕޯޓްސް ކްލަބް" ވެސް އުވާލަން ސްޕޯޓްސް ކޮމިޝަނަރަށް އަމުރުކޮށްދެއްވުމަށާއި، "ސްކޫޕު"، "ސްކޫޕު ކަންމަތި" އަދި "އެސްކޭޕީ" ލިޔެފައިވާ ފާރުތަކާއި އެންމެހާ ތަންތަނުން އެ ނަން ފޮހެލަން އައްޑޫ ސިޓީ ކައުންސިލްގެ މައްޗަށް އަމުރުކޮށްދޭން އެދިފައިވާނެ ކަމަށް ޕީޖީ އޮފީހުން ބުންޏެވެ.

މިއީ ފުލުހުން ގޭންގެއްގެ ގޮތުގައި ކަނޑައަޅައިދޭން އެދުނު ދެވަނަ ގްރޫޕެވެ. އެކަމަކު، އެ ފަހަރު ޕީޖީ އޮފީހުން ވަނީ ގޭންގެއްކަން ސާބިތުކުރަން ބޭނުންވާ މިންވަރަށް ފުލުހުން ތަހުގީގު ފުރިހަމަކޮށްފައިނުވާ ކަމަށް ބުނެ، އެ ހުށަހެޅުން އަނބުރާ ފޮނުވާލާފަ އެވެ. އެހެންވެ، މިއީ ގޭންގެއް ގޮތުގައި ގްރޫޕެއް ކަނޑައަޅަން ކޯޓަށް ހުށަހެޅި ފުރަތަމަ ހުށަހެޅުމެވެ.

އެ މައްސަލައާ ގުޅިގެން ކޯޓުން ގޮތެއް ކަނޑައެޅުމުން ގާނޫނުގެ ދަށުން އެ ގްރޫޕާއި، ގްރޫޕްގެ މެންބަރުންނާ މެދު އިތުރަށް އަޅަންޖެހޭ ފިޔަވަޅުތައް އެޅުމުގެ މަސައްކަތް ފުލުހުންނާ ގުޅިގެން ކުރަމުން ގެންދާނެ ކަމަށް ޕީޖީ އޮފީހުން ނެރުނު ބަޔާނެއްގައިވެ އެވެ.