ބަންޑާރަ މިސްކިތަކީ ދިވެހިންގެ ދީނާއި، ސަގާފަތާއި، ތާރީޚު ދައްކުވައިދޭ މުހިއްމު ރަމްޒެއް ކަމަށާއި، އެފަދަ ތަނެއް ތަޅާލުމަކީ ގާނޫނާ ވެސް ޚިލާފު ކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެ އެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ހާމަކުރެއްވި ގޮތުގައި ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އަޅަން ބޭނުންވާ އެހީތެރިކަން، ދީލަތި ފަރާތަކުން ވަނީ ހަމަޖައްސައިދީފަ އެވެ. އެހެންކަމުން އެ ތަނުގައި މިސްކިތް އެޅުމުގެ މަސައްކަތް ރޯދައިގެ ފަހުން ފަށާނޭ ކަމަށާއި އެ މިސްކިތާއެކު، މާލޭގެ ހުރިހާ ބޮޑެތި މިސްކިތްތައް އާވާނެ ކަމަށް ޝަހީމް ވިދާޅުވި އެވެ.

އެކަމާ ގުޅިގެން ގިނަ ބަޔަކު ސޯޝަލް މީޑިއާގައި ދަނީ ކަންބޮޑުވުން ފާޅުކުރަމުންނެވެ. ހާއްސަކޮށް ތާރީހު ދިރާސާކުރައްވައި އަދި ތާރީހީ ކަންކަން ހިމާޔަތްކުރަން ވަކާލާތުކުރައްވާ ގިނަ ބަޔަކު ވަނީ އެހާ ދުވަސްވީ މިސްކިތެއް ނެތިދާނެ ގޮތަށް އާ މިސްކިތެއް އަޅާތީ ކަންބޮޑުވުން ފާޅުކޮށްފަ އެވެ.

ސޯޝަލް މީޑިއާގައި އާޒިމް ކުރެއްވި މެސެޖެއްގައި ވިދާޅުވީ ގައުމެއްގެ ކާބަފައިން ދޫކޮށްފައިވާ މުހިއްމު އާސާރުތަކަކީ، އެ ގައުމެއްގެ މޫނުބަލާ ލޯގަނޑު ކަމަށް ވާއިރު، ގަރުނެއް ވާން ކައިރިވެފައިވާ ބަންޑާރަ މިސްކިތް ތަޅައިލުމަށް ސަރުކާރުން ނިންމި ނިންމުން އެއްގޮތަކަށް ވެސް ބަލައި ނުގަންނަ ކަމަށެވެ. އަދި ބަންޑާރަ މިސްކިތަކީ ދިވެހިންގެ ދީނާއި، ސަގާފަތާއި، ތާރީޚު ދައްކުވައިދޭ މުހިއްމު ރަމްޒެއް ކަމަށް މޭޔަރު ވިދާޅުވި އެވެ.

ހަމައެއާއެކު މި މިސްކިތް ހުރި ހިސާބުގެ ގޮތުން މާލެ ސިޓީއަށް ޒިޔާރަތްކުރާ މީހުންގެ މެދުގައި ވެސް، މި ބިނާއަކީ ވަރަށް މަގުބޫލު ތަނަކަށް ވަނީ ވެފައި ކަމަށް މޭޔަރު ވިދާޅުވި އެވެ. އަދި ބަންޑާރަ މިސްކިތް ތަޅައިލުމަކީ، ރާއްޖޭގެ ތާރީޚީ ބިނާތަކާއި، ސަގާފީ ތަރިކަ ރައްކާތެރިކުރުމުގެ ގާނޫނާ ވެސް ޚިލާފު ކަމަކަށް ވާތީ، ސަރުކާރުގެ މި ނިންމުން ބަދަލުކުރުމަށް އާޒިމް ގޮވައިލެއްވި އެވެ.

ބަންޑާރަ މިސްކިތަކ ވޯރާ ވިޔަފާރިވެރިން ބިނާކުރި ވަރަށް ޒަމާންވީ މިސްކިތެކެވެ. މާލޭގެ އެންމެ ކާރުބާރު ބޮޑު އުތުރު ފަރާތުގައި ހުންނަ ބަންޑާރަ މިސްކިތަށް، ކުރީގެ ރައީސް އިބްރާހީމް ނާސިރާއި މައުމޫން އަބްދުލްގައްޔޫމްގެ ވެރިކަމުގައި ބޮޑެތި ބަދަލުތަކެއް ގެނަ އެވެ.

ތާރީޚަށް ލޯބިކުރައްވާ އެތައް ބަޔަކު ދަނީ އެ މިސްކިތް ތަޅާނުލައި، ހިމާޔަތްކުރުމަށް ގޮވާލަމުންނެވެ. އަދި "ސޭވް ބަންޑާރަ މިސްކިތް" ނަމުގައި ގިނަ ބަޔަކު ދަނީ ސޯޝަލް މީޑިއާ ކެމްޕެއިނެއް ވެސް ކުރަމުންނެވެ.

އެއާއެކު ސޯޝަލް މީޑިއާގައި މިނިސްޓަރު ޝަހީމް ވަނީ ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމަނާފައި އޮންނަ މިސްކިތެއް ނޫން ކަމަށް ވިދާޅުވެފަ އެވެ. އަދި އެތަނުގައި ބޮޑު މިސްކިތެއް ބިނާކުރަން ގަސްތުކުރީ އެ ސަބަބަށްޓަކައި ކަމަށް ޝަހީމް ވިދާޅުވި އެވެ.