ބޮލީވުޑްގެ އެންމެ މަގުބޫލު އަދި އެންމެ ނުފޫޒުގަދަ އެއް ޖޯޑު ކަމަށްވާ ސައިފް އަލީ ހާން އާއި ކަރީނާ ކަޕޫރު ހާން އެކީގައި ރަތް ދޫލަތަކުންނާއި އިޝްތިހާރުތަކުން ވަރަށް ގިނައިން ފެނުނު ނަމަވެސް ބޮޑު ސްކްރީނުން މި ދެތަރިން އެކީގައި ނުފެންނަތާ ވަނީ ގިނަ އަހަރުތަކެއް ވެފަ އެވެ.

ނަމަވެސް، ފިލްމީ ދާއިރާގެ ހަބަރުތައް ބުނާ ގޮތުން މި ދެމަފިރިން އެކީގައި ފިލްމީ ޕްރޮޖެކްޓަކުން ފެނުމުގެ ފުރުސަތު މިހާރު ވަނީ ވަރަށް ބޮޑުވެފަ އެވެ.

މިކަމާ ގުޅޭގޮތުން ވާހަކަ ދައްކަމުން ސައިފް ހާމަކުރި ގޮތުގައި، އޭނާ އާއި ކަރީނާ އަލުން އެކީގައި ފިލްމެއް ކުޅޭނަމަ، އެ ފިލްމަކީ ހޮލީވުޑްގެ މަޝްހޫރު ފިލްމެއް ކަމަށްވާ "މިސްޓަ އެންޑް މިސިސް ސްމިތު" ކަހަލަ ވަރުގަދަ އެކްޝަން އަދި ރޮމެންޓިކް ފިލްމަކަށް ވާން ޖެހޭނެ އެވެ.

ސައިފް ބުނިގޮތުގައި، އާއްމުކޮށް ފެންނަ ކަހަލަ އާދައިގެ ލޯބީގެ ނުވަތަ ޑްރާމާ ފިލްމެއްގައި ކަރީނާއާއެކު މަސައްކަތް ކުރާކަށް އޭނާ ބޭނުމެއް ނުވެ އެވެ.

އޭގެ ބަދަލުގައި ދެމީހުންގެ މެދުގައި އޮންނަ "ކެމިސްޓްރީ" އެންމެ ފުރިހަމައަށް ދެއްކޭނީ ތަފާތު،އަދި ހަލުވި އެކްޝަން ސީންތަކެއް ހިމެނޭ ސްކްރިޕްޓަކުން ކަމަށް ސައިފް ބުންޏެެވެ.

"އަހަރެމެން ދެމީހުން އެކީގައި ފެންނަންވާނީ ވަރަށް ސްމާޓް، 'މިސްޓަ އެންޑް މިސިސް ސްމިތު' ކަހަލަ ފިލްމަކުން. އޭރުން ބެލުންތެރިންނަށްވެސް އެއީ ވަރަށް ޝައުގުވެރި ކަމަކަށް ވާނެ،" ސައިފް ބުންޏެވެ.

ހޮލީވުޑްގެ ފިލްމު "މިސްޓަ އެންޑް މިސިސް ސްމިތު"އަކީ ބްރެޑް ޕިޓް އާއި އެންޖެލީނާ ޖޮލީ ކައިވެނި ކޮށްގެން އުޅޭ ސިއްރު ދެ އެޖެންޓުންގެ ރޯލުން ފެނިގެންދާ ދުނިޔޭގެ ސިނަމާތަކުގައި ބޮޑު ހިޓަކަށްވި ފިލްމެކެވެ.

ސައިފް އާއި ކަރީނާ މީގެ ކުރިން އެކީގައި ކުޅެފައިވާ ފިލްމުތަކަށް ބަލާއިރު 2008 ވަނަ އަހަރު ނެރުނު "ޓަޝަން" ފިލްމުގެ ސެޓުން މި ދެތަރިންގެ ލޯބީގެ ގުޅުން ފެށުނު ނަމަވެސް ފިލްމަށް ބޮކްސް އޮފީހުގައި ލިބުނީ ނާކާމިޔާބީއެކެވެ.

2009ގެ "ގުރުބާން"ގައި އެ ދެމީހުންގެ ފަރާތުން ވަރުގަދަ އެކްޓިންއެއް ފެނުނު ނަމަވެސް ބެލުންތެރިންގެ މާބޮޑު ތަރުހީބެއް ނުލިބުނެވެ. އެކްޝަން ފިލްމެއްގެ ގޮތުގައި 2012 ވަނަ އަހަރު ރިލީޒްވި "އޭޖެންޓް ވިނޯދު"އަށް ވެސް މާ ބޮޑު ކާމިޔާބެއް ނުލިބެ އެވެ.

.ސައިފް ގަބޫލުކުރާ ގޮތުގައި ކުރީގެ ފިލްމުތައް ކާމިޔާބުނުވީ ސްކްރިޕްޓްތަކުގެ ބަލިކަށި ކަމުންނެވެ. އެހެންކަމުން، މިފަހަރު ދެމީހުން އެކީގައި ކެމެރާގެ ކުރިމައްޗަށް އަންނާނީ ބެލުންތެރިން ސިއްސުވާލާ ފަދަ މޮޅު ވާހަކައަކާއެކުގަ ކަމަށް އޭނާ ބުނެ އެވެ.

މިހާރުވެސް ސައިފް އާއި ކަރީނާ ދަނީ ވަކިވަކިން ވަރަށް ބޮޑެތި ފިލްމުތަކެއްގެ މަސައްކަތް ކުރަމުންނެވެ. ކަރީނާ އޭނާގެ ފަހުގެ ފިލްމުތަކުން ބޮޑު ކާމިޔާބީއެއް ހޯދަމުންދާއިރު ސައިފް ދަނީ ދެކުނު ފިލްމު އިންޑަސްޓްރީގެ ބޮޑެތި ޕްރޮޖެކްޓްތަކުންނާއި ހިންދީ ފިލްމުތަކުން ފެނުމަށް ތައްޔާރުވަމުންނެވެ.

ބޮލީވުޑްގެ ޖޯޑު "ސައިފީނާ"ގެ ފޭނުން މިހާރު ތިބީ ހޮލީވުޑް ސްޓައިލްގެ އެކްޝަން ފިލްމަކުން މި ދެމަފިރިން އެކީގައި ފެންނާނެ ދުވަހަކަށް ކެތް މަދުވެފަ އެވެ.