Sarukaarun ulhenee Rasmale gai yahoodheen vazanveri kuran: Raees Yameen

ސަރުކާރުން މިހާރު މަސައްކަތް ކުރަމުންދަނީ ރަސްމާލޭގައި ޔަހޫދީން ވަޒަންވެރިކުރުވުމަށް ކަމަށް ވިދާޅުވެ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ސަރުކާރަށް ވަރަށް ބޮޑަށް ފާޑުވިދާޅުވެއްޖެ އެވެ.

ރޭ ޕީއެންއެފް އިން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، އެންމެ ބޮޑު އުނދަގުލެއް ވަނީ ދިވެހި ރައްޔިތުން އާބާދުކުރަން އޮތް ބިމެއް ޔަހޫދީންގެ އަތްމައްޗަށް ދޫކޮށްލާތީ ކަމަށެވެ. އަދި ޔަހޫދީންނާއި ދިވެހިން އެކީގައި ދިރިއުޅޭގޮތް ހަދަން އުޅޭތީ އެކަމުގެ ކަންބޮޑުވުން އެމަނިކުފާނު ފާޅުކުރެއްވި އެވެ.

ރައީސް ޔާމީން އިތުރަށް ވިދާޅުވީ، މި މަޝްރޫއު ހިންގުމަށް ގެނެސްފައިވާ ކުންފުންޏަކީ ނޭދެވޭ ވިޔާނުދާ ކަންތައްތަކެއް ކުރުމަށް އުފައްދާފައިވާ ތަނެއް ކަމަށެވެ. އަދި މިއީ އަވަސް އަރުވާލައިގެން، ޔަހޫދީންނަށް ފައިސާ ނަގައިދިނުމަށާއި ބޭނުންވާ މިންވަރަށް ފައިސާ ދިނުމަށްޓަކައި ރާއްޖެ ވިއްކާލުން ފަދަ ކަމެއް ކަމަށްވެސް އެމަނިކުފާނު ވިދާޅުވި އެވެ.

"ބަންޑާރަނައިބު ދައްކާ ވާހަކައިން އެބަ އެނގޭ މިކަމާބެހޭ ގާނޫނުތައް ވެސް އަލުން ހަދަންޖެހެނީ. އެހެންވީމަ މިކަމުންވެސް އެނބަ އެނގޭ މީ ބަލަންވާވަރަށް ނުބަލާ އަވަސް އަރުވާލައިގެން ކޮށްފައޮތް ކަމެއްކަން. އަވަސް އަރުވާލައިގެން ޔަހޫދީންނަށް މިތަން ދީފަ މިއޮތީ، ލާރި ނަގަންވާ ބަޔަކަށް ލާރި ދީފަ،" ރައީސް ޔާމީން ވިދާޅުވި އެވެ.

ބަންޑާރަނައިބު އަހުމަދު އުޝާމަށް ރައްދު ދެއްވަމުން ރައީސް ޔާމީން ވިދާޅުވީ، މައްސަލައަކަށް ވެގެން މިއުޅެނީ ރަސްމާލެ 99 އަހަރަށް ކުއްޔަށް ދިނުން ނޫން ކަމަށެވެ. ނަމަވެސް، ރައީސް މުހައްމަދު މުއިއްޒާއި ބަންޑާރަނައިބު އުޝާމް އަދި ސަރުކާރުގެ އިސްވެރިން ގުޅިގެން މި ގައުމަށް ޔަހޫދީން ގެންނަން އުޅޭތީ ކަމަށާއި، އެކަމަށް ސަރުކާރަށް ޖަވާބުދާރީ ނުވެވޭ ކަމަށް އެމަނިކުފާނު ވިދާޅުވި އެވެ.

ރަސްމާލެއަކީ ރަނގަޅު މަޝްރޫއެއް ކަމަށް ރައީސް ޔާމީން ވިދާޅުވި ކަމަށް ބުނެ ޕީއެންސީގެ ބައެއް މަޖިލިސް މެންބަރުން މަޖިލީހުގައި ދެއްކެވި ވާހަކަތަކަށް ވެސް އެމަނިކުފާނު ރައްދު ދެއްވި އެވެ. އެގޮތުން، ރަސްމާލެ ހިއްކަން ނިންމެވީ އެމަނިކުފާނުގެ ވެރިކަމުގައި ކަމަށާއި، އެއީ އޭރުގެ އިގްތިސާދީ ދުވެލީގެ ބާރުމިން އެ ގޮތުގައި ހިފެހެއްޓިއްޖެނަމަ އަދި ދެވަނަ ދައުރެއް ލިބިވަޑައިގެންފިނަމަ ކުރިއަށް ގެންދަން ނިންމެވި ކަމެއް ކަމަށް ވިދާޅުވި އެވެ. އޭގެ ބޭނުމަކީ 2030 ގެ ކުރިން ޒުވާނުންނަށް ބޯހިޔާވަހިކަން ކަށަވަރުކޮށްދެއްވުން ކަމަށް ޔާމީން ފާހަގަކުރެއްވި އެވެ.

"މިހާރު ރަސްމާލެ ހިއްކުމަކީ ބޭކާރު ހަރަދެކޭ ބުނާ ސަބަބަކީ މިހާރު ދައުލަތުގެ ދަރަނި އޮތްވަރު ބޮޑުންނަށް އެނގޭބާ؟ މިވީ 3 އަހަރު ދައުލަތުގެ ދަރަންޏަކީ 160 ހާސް މިލިއަން ދިވެހި ރުފިޔާ،" ރައީސް ޔާމީން ވިދާޅުވި އެވެ.

ރައީސް ޔާމީން ވިދާޅުވީ، ދައުލަތުގައި މިހާ ބޮޑު ދަރަންޏެއް އޮއްވައި އިތުރަށް ލޯނު ނަގައިގެން މި ދަނޑިވަޅުގައި ރަސްމާލެ ހިއްކުމަކީ ބޭކާރު އަދި ގެއްލުން ބޮޑު ހަރަދެއް ކަމަށެވެ.