ރަސްމާލޭގައި ހިންގުމަށް ރާވާފައިވާ ބޮޑު މަޝްރޫއު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށާއި، ގާނޫނުއަސާސީއާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމަށް ވިދާޅުވެ، ބަންޑާރަނައިބު އަހުމަދު އުޝާމް ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ރައްދު ދެއްވައިފި އެވެ.

އަބޫދާބީގެ އީގަލް ހިލްސް ކުންފުންޏާއެކު 20 ބިލިއަން ޑޮލަރުގެ މި މަޝްރޫއުގެ އެއްބަސްވުމުގައި ސޮއިކުރުމާ ގުޅިގެން، އެއީ ގައުމު ވިއްކާލުން ކަމަށް ބުނެ އިދިކޮޅު ފަރާތްތަކުންނާއި ރައީސް ޔާމީން ވަނީ ފާޑުވިދާޅުވެފަ އެވެ.

އެ ފާޑުކިޔުންތަކަށް ރައްދު ދެއްވަމުން ސޯޝަލް މީޑިއާގައި ކުރެއްވި ޕޯސްޓެއްގައި އުޝާމް ވިދާޅުވީ، ރިޒޯޓުތައް 99 އަހަރަށް ދޫކުރާ މައްސަލައިގައި ރައީސް ޔާމީން މިއަދު ހަނދުމަފުޅުނެތީ ކަމަށް ވެދާނެ ކަމަށެވެ. އެގޮތުން، ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ގާނޫނެއް 1999 ވަނަ އަހަރު އެކުލަވާލިއިރު ރިޒޯޓުތައް ކުއްޔަށް ދިނީ ގިނަވެގެން 25 އަހަރަށް ކަމަށާއި، 2010 ވަނަ އަހަރު ރައީސް މުހައްމަދު ނަޝީދުގެ ވެރިކަމުގައި އެ މުއްދަތު 50 އަހަރަށް އިތުރުކުރި ކަމަށް އޭނާ ފާހަގަކުރެއްވި އެވެ. އަދި އެ މުއްދަތު 99 އަހަރަށް އިތުރުކޮށްފައި ވަނީ 2015 ވަނަ އަހަރު ރައީސް ޔާމީންގެ ވެރިކަމުގައި ކަމަށް އުޝާމް ވިދާޅުވި އެވެ.

މީގެ އިތުރުން ޓޫރިޒަމާ ބެހޭ ގާނޫނުގެ 8 ވަނަ މާއްދާގައިވާ ގޮތުން 99 އަހަރުގެ މުއްދަތު ހަމަވުމުން، އެ ރަށެއްގައި ކޮށްފައިވާ އިންވެސްޓްމަންޓްގެ އަގުން ބޮލަކަށް ކެނޑުމަށްފަހު ޖެހޭ އަގު ސަރުކާރުން އިންވެސްޓަރަށް ދައްކަންޖެހޭކަން އޭޖީ ފާހަގަކުރެއްވި އެވެ. ނަމަވެސް މިއާ ހިލާފަށް ރަސްމާލޭގައި ހިންގާ މަޝްރޫއު ހިންގައި ބަލަހައްޓާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށް އޭނާ ވިދާޅުވި އެވެ.

އުޝާމް އިތުރަށް ވިދާޅުވީ، ރަސްމާލެ މަޝްރޫއާ ގުޅިގެން މިހާތަނަށް ސޮއިކޮށްފައި ވަނީ ހަމައެކަނި 'ލެޓާ އޮފް އިންޓެންޓް' (ކޮމާޝަލް ޓާމްސް އެގްރީމެންޓް) އެއްގައި ކަމަށެވެ. އަދި މަޝްރޫއު އަމަލީގޮތުން ފެށުމުގެ ކުރިން އެ އެގްރީމެންޓުގައިވާ މާއްދާތަކަށް ބިނާކޮށް އިތުރަށް މަޝްވަރާކޮށްގެން 'ޑެފިނިޓިވް އެގްރީމެންޓް' ތަކެއްގައި ސޮއިކުރާނެ ކަމަށާއި، ކަމާ ގުޅުންހުރި ގާނޫނުތައް މަޖިލީހުން ފާސްކުރަންޖެހޭނެ ކަމަށް ވިދާޅުވި އެވެ.

އޭނާ ވަނީ މި މަޝްރޫއު ކުރިއަށް ގެންދިއުމުގައި ގާނޫނުއަސާސީއާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމުގެ ޔަގީންކަން ދެއްވާފަ އެވެ.

މި މަޝްރޫއާ ގުޅިގެން ސަރުކާރުން ވެފައިވާ އެއްބަސްވުމަކީ ގާނޫނުއަސާސީގެ 250 ވަނަ މާއްދާއާ ހިލާފު އެއްބަސްވުމެއް ކަމަށް ބުނެ އެ އެއްބަސްވުން ބާތިލުކުރަން ސުޕްރީމް ކޯޓަށް ދުސްތޫރީ މައްސަލައެއް ވެސް މިހާރު ވަނީ ހުށަހަޅާފަ އެވެ.

މި ލިޔުމާ ގުޅޭ އިތުރު ލިޔުން
Fushidhiggaru falhu ge bin UAE ge kunfunyah kujjah dhin massala supreme court ah ރަސްމާލެ މައްސަލަ ސުޕްރީމް ކޯޓަށް ހުށަހަޅައިފި
RasMale fadha binthah dhinumuge kurin rayyithun ge fennna nufenna vote eh nagan jehey: Yameen ރާސްމާލޭގެ ބިންތައް ދިނުމުގެ ކުރިން ވޯޓެއް ނަގަންޖެހޭ: ޔަމީން
Agreement haama koh suvaaluthakah javaabudheyn Fayyaz govaalavvaifi އީގަލް ހިލްސްގެ އެގްރީމެންޓް ހާމަކުރަން ފައްޔާޒް ގޮވާލައްވައިފި