ސަރުކާރުގެ ފަރާތުން ތުޅާދޫ ދާއިރާގެ މެމްބަރު ހިސާން ހުސައިން މަޖިލީހަށް ހުށަހަޅާފައިވާ "ނަފްރަތު"ގެ ބިލު މަޖިލީހުގެ ޖުޑިޝަރީ ކޮމެޓީގައި ކުރިއަށް ގެންދަން އެ ކޮމިޓީއިން ނިންމައިފި އެވެ.

"ނަފްރަތު" ބިލާ ގުޅިގެން ރޭ ޖުޑިޝަރީ ކޮމެޓީގައި ބޭއްވި ބައްދަލުވުމުގައި ގުރައިދޫ ދާއިރާގެ މެމްބަރު އިބްރާހިމް ރިޒާ ހުށަހެޅުއްވީ އެ ބިލު އެކޮމެޓީން ބޭރު ކުރުމަށެވެ. ނަމަވެސް އެ ކޮމިޓީއިން ނިންމީ ބިލު ދިރާސާކުރުމުގެ މަސައްކަތް ކުރިއަށް ގެންދިޔުމަށާއި އަންނަ މަހުގެ އެއް ވަނަ ދުވަސް އަންނަން ވާއިރަށް ބިލުގެ މަސައްކަތް ނިންމާލުމަށެވެ.

ރިޒާގެ ހުށަހެޅުމާ ގުޅޭގޮތުން ކޮމިޓީގެ މުގައްރިރު އިމްތިޔާޒު ވިދާޅުވީ ބިލާ ގުޅޭ ގޮތުން އެކި މުއައްސަސާތަކުން ހިޔާލު ހޯދިއިރު ވެސް ބިލު ބޭރު ކޮށްލަން އެއްވެސް މުއައްސަސާއަކުން ލަފާދީފައި ނެތް ކަމަށެވެ.

މީގެ އިތުރުން އިމްތިޔާޒް ވިދާޅުވީ އިސްލާމިކް މިނިސްޓްރީ، ޕްރޮސެކިޔުޓާ ޖެނެރަލްގެ އޮފީހުގެ އިތުރުން ހިއުމަން ރައިޓްސް ކޮމިޝަނުގެ ހިޔާލު ހޯދަން ކޮމިޓީން އެދިފައިވާނެ ކަމަށާއި އެ ތިން މުއައްސަސާއިން ވެސް ވަރަށް ތަފްސީލީ ހިޔާލުތަކެއް ދީފާއިވާ ކަމަށެވެ.

މަޖިލީހަށް މިހާރު ހުށަހަޅާފައިވާ "ނަފްރަތް"ބިލާ މެދުގައި ގިނަ ބަޔަކު ކަންބޮޑުވުން ފާޅުކުރަމުންދާއިރު އެމްޑީޕީއިން އެބިލު ވީހާ ވެސް އަވަހަށް ފާސްކުރުމަށް ސަރުކާރަށް ދަނީ ޕްރެޝަރު ކުރަމުންނެވެ.

ބިލާ މެދު ކަންބޮޑުވުން ފަޅުކުރާ ފަރާތްތަކުން ބުނަމުން އަންނަނީ މި ބިލް ފާސްވެއްޖެނަމަ އިސްލާމް ދީނާ ދެކޮޅަށް ވާހަކަ ދައްކާ މީހުންނަށް ބޮޑު މިނިވަންކަމެއް ލިބި އެކަން ކުރުމުގެ ފުރުސަތު ފަހިވެގެންދާނެ ކަމަށެވެ.

ހިސާންގެ ބިލްގައިވާ ގޮތުން މީހަކާ ދިމާއަށް އޭނާއަކީ އިސްލާމް ދީނާ ޚިލާފަށް ނުވަތަ އިސްލާމް ދީނާ ދެކޮޅަށް އުޅޭ މީހެކޭ ބުނުމަކީ ކުށެކެވެ. މި ގޮތަށް މި ބިލް ފާސްކޮށްފިނަމަ އިސްލާމްދީނާ ދެކޮޅަށް ފާޅުގައި އުޅޭ ބޭރުގެ ފަރާތްތަކާ ދިމާލަށް ވެސް އެމީހަކީ ދީނާ ދެކޮޅަށް މަސައްކަތް ކުރާ މީހެކޭ ބުނެފި ނަމަ އެއީ ކުށެއް ކަމަށް ކަނޑައެޅޭނެ އެވެ.