މާލޭގެ ގެއެއްގައި ރޯވެ އަލިފާނުގެ ހާދިސާއެއް ހިނގައިގެން އެމްއެންޑީއެފުން ހަރަކާތްތެރިވާން ފަށައިފި އެވެ.

މި ހާދިސާ ހިނގާފައި ވަނީ ހ. ދޮންޖޭމުގެއާގޭ 5 ވަނަ ފަންގިފިލާގަ އެވެ. އަލިފާންގަނޑު ނިއްވާލުމަށް އެމްއެންޑީއެފް ފަޔާ އެންޑް ރެސްކިޔު އިން ހަރަކާތްތެރި ވިއިރު، އެމްއެންޑީއެފުން ދިޔައީ އެގެއިން މީހުން ހުސް ކުރަމުންނެވެ.

އަލިފާނުގެ ހާދިސާގެ ރިޕޯޓު މިއަދު މެންދުރު 1:29 ގައި އެމްއެންޑީފަށް ލިބިފައިވާކަން ފާހަގަކޮށް އެމްއެންޑީއެފުން ވަނީ ރޯވި އަލިފާން އެމްއެންޑީއެފް ފަޔާ އެންޑް ރެސްކިޔު ސާވިސްއިން މިހާރު ވަނީ ނިއްވާލާފައި ކަމަށް ބުނެފަ އެވެ.

އެމްއެންޑީއެފުން ބުނީ މިހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ. މި ހާދިސާ ހިނގީ ކޮން ސަބަބަކާ ހެދި ކަމެއް މިހާތަނަށް އެމްއެންޑީއެފުން ހާމަކޮށްފައެއް ނުވެ އެވެ.

އިއްޔެ ވެސް މާލޭގެ މަޝްހޫރު ޑޮނާޑް ގާމެންޓް ހުންނަ އިމާރާތުގެ ތިންވަނަ ފަންގިފިލާގައި އަލިފާނުގެ ހާދިސާއެއް ހިނގާފައިވެ އެވެ.