ރާއްޖޭގައި މިހާރު ވައިރަލްވެފައިވާ ރޯގާ ހަލުވިކަމާއި އެކު ފެތުރެމުންދާކަމަށާއި، ކުޑަކުދިންނަށް ރޯގާ ޖެހޭވަރު މިންވަރު މަދު ނުވާ ކަމަށް އައިޖީއެމްއެޗް ގެ ކުޑަކުދިންގެ ހާއްސަ ޑޮކްޓަރު އަދި މޯލްޑިވްސް ޓެކްނިކަލް އެޑްވައިސަރީ ގްރޫޕް އޮން އިމިއުނައިޒޭޝަންގެ ޗެޔާޕާސަން ޑރ. އަހުމަދު ފައިސަލް ވިދާޅުވެއްޖެ އެވެ.

ރޯގާޖެހޭ މިންވަރު އަދިވެސް މަދުނުވާކަން ފާހަގަކުރައްވައި ޑރ. ފައިސަލް މިއަދު ކުރެއްވި ޓުވީޓެއްގައި ވަނީ ތުއްތު ކުދިން އެހެނިހެން ބަލިތައް ހުންނަނަމަ ބޮޑުވަރުވާ ކަމަށް ވިދާޅުވެފަ އެވެ. މިގޮތުން މިހާރުވެސް ހަ ކުޑަކުއްޖަކަށް އައިސީޔޫގައި ފަރުވާދެމުން ގެންދާކަމަށް ޑރ. ފައިސަލް ވިދާޅުވި އެވެ.

އޭގެ އިތުރުން ރައްކާތެރިވެވެންހުރި ކަންތައްތަކަށް ސަމާލުވެލެއްވުމަށާއި ގެއަށް ރޯގާ ގެނައުން މަދުކުރަމަށްޓަކައި ގިނައިން އަތްދޮވުމުގެ އިތުރުން، ކުޑަކުއްޖަކު އުރާލަން ބައިހަދާފައި ނުދިއުމަށާއި، މީހުން އެއްވާތަންތަނަށް ނުދިއުމަށްވެސް ޑރ. ފައިސަލް ވަނީ އިލްތިމާސްކޮށްފަ އެވެ.

ރާއްޖޭގައި މިދުވަސްކޮޅު އެންމެ ހަލުވި ދުވެއްޔެއްގައި ފެތުރެމުން ގެންދާ ބައްޔެއްކަމަށް ޑޮކްޓަރުން ބުނެފައިވަނީ އިންފުލުއެންޒާގެ ޓައިޕް އޭ އެވެ. މި ބައްޔަކީވެސް ކޮވިޑާއި އެއްފަދައިން ނޭވާލާ ނިޒާމަށް އުނދަގޫތަކެއް ކުރުވައި، ކެއްސައި، ހުން އައިސް ރޯގާގެ އަލާމާތްތައް ހުރި ނުރައްކާތެރި ބައްޔެކެވެ. އަދި މިބަލިން ސަލާމަތްވުމަށް އިންފްލުއެންޒާ ވެކްސިން ޖެހުމަށް ސިއްހީ މާހިރުން ދަނީ ލަފާދެމުންނެވެ.