ރާއްޖެއަށް ކުރަމުންދާ ވިއްސާރާގައި މ. އަތޮޅުގެ ތިން ރަށެއްގައި ފެން ބޮޑުވެއްޖެ އެވެ.

ބޯކޮށް ވިއްސާރަ ވެހުމުގެ ސަބަބުން ފެންބޮޑުވެފައި ވަނީ މުއްޔާއި މުލަކު އަދި ވޭވަށުގަ އެވެ.

މ. އަތޮޅު ކައުންސިލްގެ ރައީސް މުހައްމަދު ނިމާލް ވަނީ ރެއިން ފެށިގެން އެތިން ރަށަށް މެދުކެނޑުމެއްނެތި ވާރޭ ވެހެމުންދާ ކަމަށެވެ. އަދި އެ ތިން ރަށުގެ މަގުތަކުގައި ފެންބޮޑުވުމުގެ ސަބަަބުން ފެންގަނޑު ގޭގެތަކަށް ވަންނަމުންދާ ކަމަށް ވެސް އޭނާ ވިދާޅުވި އެވެ.

މި ރަށްތަކުގައި ފެން ބޮޑުވުމުން ކައުންސިލާއި އާންމުން ގުޅިގެން ފެން ހިންދުމަށް ދަނީ އެކީގައި މަސައްކަތް ކުރަމުންނެވެ. އަދި ފެން ހިންދުމަށް އެމްޓީސީސީންނާއި އާރުޑީސީން އެހީތެރިވަމުން އަންނަ ކަމަށް ވެސް ނިމާލް ވިދާޅުވި އެވެ.

ރާއްޖެއަށް މޫސުން ގޯސްވުމާއި ގުޅިގެން މޫސުމާއި ބެހޭ ގައުމީ އިދާރާއިން ވަނީ މޫސުމަށް ސަމާލުވުމަށް އެދި ބައެއް އަތޮޅުތަކަށް ރީނދޫ ސަމާލު ނެރެފަ އެވެ.

މި ދުވަސްވަރު މޫސުން ގޯސްވަނީ ރާއްޖޭގެ އިރު އުތުރުން ސްރީލަންކާ ކައިރީގައި ކޮޅިގަނޑެއްގެ އަސަރު ކުރާތީކަމަށް މެޓް އިން ވަނީ ބުނެފަ އެވެ. އަދި މި ދުވަސްވަރު ބައެއް ސަރަހައްދުތަކަށް ވިއްސާރަކުރާނެ ކަމަށާއި، ކަނޑުތައް ގަދަވާނެކަމަށް މެޓް އިން ލަފާކޮށްފައިވެ އެވެ.