ދުނިޔޭގެ ބާޒާރުގައި ތެލުގެ އަގު ބޮޑުވުމާއި ގުޅިގެން ޓެކްސީ ދަތުރުތަކުގެ އަގު ސެންޓަރުތަކަށް އަމިއްލައަށް ބޮޑު ކުރި އަގުގައި އަލުން ދަތުރުތައް ފެށުމަށް ނިންމައިފި އެވެ.

ދުނިޔޭގެ ބާޒާރުގައި ތެލުގެ އަގު މަތިވުމާއި ގުޅިގެން ޓެކްސީ ދަތުރުތަކުގެ އަގު ބޮޑުކޮށްދިނުމަށް އެދި ޑްރައިވަރުން ވަނީ ޓްރާންސްޕޯޓް މިނިސްޓްރީއަށް ވެސް ދަންނަވާފަ އެވެ. އެހެން ނަމަވެސް މިއަދާ ހަމައަށް އައިރު ވެސް އެ މިނިސްޓްރީން އެ ސިޓީއަށް އެކަށީގެންވާ ޖަވާބެއް ދީފައެއް ނުވެ އެވެ.

ޓެކްސީ ޑްރައިވަރުން އެދުނު ގޮތަށް ސަރުކާރުން އިޖާބަދީފައި ނުވާތީ އިއްޔެއިން ފެށިގެން ޓެކްސީ ޑްރައިވަރުން އަންނަނީ މުޒާހަރާ ކުރަމުންނެވެ.

ޓްރާންސްޕޯޓް މިނިސްޓްރީން ކަނޑައަޅާފައިވާ އަގުގައި ނޫން އެހެން އަގެއްގައި ޓެކްސީ ހިދުމަތްދޭ ނަމަ އެކަމަށް ފިޔަވަޅު އަޅާނެ ކަމަށް ފުލުހުން ވަނީ ބުނެފަ އެވެ.

އެހެން ކަމުން ޓެކްސީ ސެންޓަރުގެ ވެރިން/ހިންގުމާއި ހަވާލުވެ ތިބި އިސްވެރިންގެ މަޝްވަރާ ބައްދަލުވުމަށްފަހު އެ ފަރާތްތަކުން ވަނީ ތަކެތީގެ އަގަށާއި ތެލުގެ އަގަށް އަންނަ ބަދަލާއި ގުޅިގެން ޓެކްސީގެ ހިދުމަތުގެ އަގު ބޮޑު ކުރަން ނިންމާފަ އެވެ. އަދި ސެންޓަރުތަކުން ކަނޑައަޅާ އަގުތަކުގެ ފައިނަލް ޑްރާފްޓް އެކުލަވާލާއި ހުރިހާ ސެންޓަރެއްގެ ތައްގަނޑު ޖަހާ ސޮއި ކުރުމަށްފަހު ޓްރާންޕޯޓް މިނިސްޓްރީއަށް ފޮނުވުމަށް ވަނީ ނިންމާފަ އެވެ.

އަދި މިނިސްޓްރީން ވަކި ގޮތަކަށް ނުނިންމި ކަމުގައި ވިއަސް އިއްޔެއިން ފެށިގެން ޑްރައިވަރުންގެ ހިޔާލާއެކު، ހުރިހާ ސެންޓަރުތަކުން އިއްތިފާގުވެ އެއްބަސްވާ އަގުތަކަށް ހިދުމަތް ދިނުމަށް ފެށުމަށް ނިންމާފައިވާ ކަމަށް ވެސް ވަނީ ބުނެފަ އެވެ.

ޓެކްސީ ސެންޓަރުތަކުން އަމިއްލައަށް ކަނޑައެޅި އަގުތައް:

  • މާލެ ސިޓީގެ އެތެރޭގެ ދަތުރުތައް، 30 ރުފިޔާ.
  • ހުޅުމާލޭ ފޭސް 1 ގެ އެތެރޭގެ ދަތުރުތައް، 25 ރުފިޔާ
  • ހުޅުމާލޭ ފޭސް 2 ގެ އެތެރޭގެ ދަތުރުތައް، 25 ރުފިޔާ
  • މާލެއިން ހުޅުމާލެއަށް/ހުޅުމާލެއިން މާލެއަށް، 100 ރުފިޔާ
  • މާލެއިން އެއާޕޯޓަށް/އެއާޕޯޓުން މާލެއަށް، 80 ރުފިޔާ
  • ހުޅުމާލެއިން އެއާޕޯޓަށް/އެއާޕޯޓުން މާލެއަށް، 80 ރުފިޔާ
  • ހުޅުމާލޭ ފޭސް 2 އިން މާލެއަށް/މާލެއިން ހުޅުމާލެ ފޭސް 2 އަށް، 120 ރުފިޔާ
  • ހުޅުމާލޭ ފޭސް 1 އިން ހުޅުމާލޭ ފޭސް 2 އަށް، 40 ރުފިޔާ
  • މާލެއިން ސީޕްލޭން ޓާމިނަލަށް، 100 ރުފިޔާ
  • ހުޅުމާލޭއިން ސީޕްލޭން ޓާމިނަލަށް، 100 ރުފިޔާ
  • ހުޅުމާލޭ ފޭސް 2 އިން އެއާޕޯޓަށް/އެއާޕޯޓުން ފޭސް 2 އަށް، 100 ރުފިޔާ
  • ހުޅުމާލޭ ފޭސް 2 އިން ސީޕްލޭން ޓާމިނަލަށް، 120 ރުފިޔާ

މި އަގުތަކުގެ ތެރެއަށް ދަންވަރު 00:00 އިން ހެނދުނު 6:00 އަށް ހިދުމަތް ދިނުމުގައި ފަސް ރުފިޔާ އިތުރަށް ނެގުމަށާއި ގަޑި ދަތުރުތަކަށް ޓެކްސީ ހަޔާކޮށްގެން ކުރާ ގަޑި ދަތުރު ކުރުމަށް، 1 ގަޑިއިރަށް 250 ރުފިޔާ ނަގާ ގޮތަށް ވެސް ނިންމާފައިވާ ކަމަށް ސެންޓަރުތަކުން ވަނީ ބުނެފަ އެވެ.

މިކަމާ ގުޅިގެން ޓްރާންސްޕޯޓް މިނިސްޓްރީން މީގެ ކުރިން ބުނެފައިވާ ގޮތުގައި، އެ މިނިސްޓްރީން ޓެކްސީ ދަތުރު ކުރުމުގައި ނެގޭނެ އެންމެ ބޮޑު ފީ ކަނޑާއަލާފައިވާއިރު، އެ ފީއަށް ވުރެ މަތިން އަގު ނަގާނަމަ އެ ބަޔަކާ މެދު ގާނޫނާއި ގަވާއިދުގައިވާ ގޮތުގެ މަތިން ފިޔަވަޅު އަޅާނެ އެވެ.

ޓެކްސީ ތަކުން އަގުބޮޑު ކުރަން ޑިމާންޑް ކުރާއިރު މިހާރުވެސް ބައެއް ޓެކްސީތަކުން ދަތުރު ކުރަނީ ހިތުހުރި އަގަކަށްކަން ފާހަގަ ކުރެވެ އެވެ.