ކުރިއަށް އޮތް ރިޔާސީ އިންތިހާބުގައި ޕާޓީތަކާއި އެކު ކޯލިޝަން ހެދުމާ ގުޅޭ ގޮތުން އެހެން ޕާޓީތަކާ އެކު މަޝްވަރާ ކުރުމުގެ ބާރު އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހަށް ދެއްވުމަށް މިރޭ ބޭއްވި އެ ޕާޓީގެ ގައުމީ މަޖިލީހުގެ ބައްދަލުވުން ރައީސް ނަޝީދުގެ ފެކްޝަނުން ބޮއިކޮޓް ކޮށްފި އެވެ.

އިއްޒުއްދީން ސްކޫލްގައި މިރޭ ބޭއްވި، ބައްދަލުވުމަކީ ރިޔާސީ އިންތިހާބުގައި އެހެން ސިޔާސީ ޕާޓީތަކާ އެކު އެމްޑީޕީން ކޯލިޝަން ހެދުމާ މެދު މަޝްވަރާކޮށް، ގޮތެއް ނިންމުމަށް ބޭއްވި ބައްދަލުވުމެކެވެ.

މިރޭގެ ޖަލްސާގައި ނަޝީދަށް ތާއިދު ކުރައްވާ އެއްވެސް މެމްބަރަކު ބައިވެރިވަޑައިގެންފައެއް ނުވެ އެވެ.

އެމްޑީޕޕީ ގައުމީ މަޖިލީހުގައި 170 މެމްބަރުން ތިއްބަވާއިރު މިރޭގެ ބައްދަލުވުމަށް ވަޑައިގެން ތިއްބެވީ 85 ވަރަކަށް ބޭފުޅުންނެވެ. ނަޝީދަށް ތާއިދު ކުރައްވާ އެއްވެސް ބޭފުޅަކު މިރޭގެ ޖަލްސާގައި ބައިވެރިވެވަޑައެއް ނުގައްނަވަ އެވެ.

އެމްޑީޕީގެ ރިޔާސީ ޕްރައިމަރީން ބަލިވެވަޑައިގަތުމުން ނަޝީދު ވަނީ "ފިކުރެއްގެ ދިރުން" ނަމުގައި ވަކި ފެކްޝަނެއް އުފައްދަވާފަ އެވެ. އެ ފެކްޝަނަށް މިހާތަނަށް 50،000 މެންބަރުން ސޮއިކޮށްފައިވާ ކަމަށް ނަޝީދުގެ ސަޕޯޓަރުން އަންނަނީ ބުނަމުންނެވެ. ނަމަވެސް އެކަމުގެ ހެއްކެއް ދެއްކިފައެއް ނުވެ އެވެ.