އިސްލާމް އަބާދު (މެއި 10) - މަގާމުން ދުރުކޮށްފައިވާ ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ހައްޔަރުކުރުމާއެކު، މުޅި ގައުމުގައި ހަމަނުޖެހުން ހިނގަން ފަށައިފި އެވެ.

އެ ގައުމުގެ އެންޓި ކަރަޕްޝަން ބޯޑުން އިމްރާން ޚާން ހައްޔަރުކުރުމާ އެކު ޚާންގެ ސަޕާޓަރުންނާއި ސަލާމަތީ ބާރުތަކާ ދެމެދު ހިނގަން ފެށި ހަމަނުޖެހުންތަކުގައި އެތައް ބަޔަކަށް އަނިޔާލިބި، މަދުވެގެން އެކަކު ވަނީ މިހާތަނަށް މަރުވެފަ އެވެ.

ކުރީގެ ބޮޑުވަޒީރު އިމްރާން ޚާން ހައްޔަރުކުރީ މިދިޔަ އަހަރު އެމަނިކުފާނު އަވަހާރަކޮށްލަން ދެވުނު ހަމަލާ ރޭވުމުގައި އިސްވެ ހުރީ ސިފައިންގެ މަތީ އޮފިސަރެއް ކަމަށާއި އެމަނިކުފާނު މަގާމުން ވަކިކުރުމުގެ ހަރަކާތްތައް ރޭވުމުގައި އިސްކޮށް ހުރީ އާމީ ޗީފް ކަމުގައި އެތަކެއް ފަހަރު ތުހުމަތު ކުރައްވާފައި ވަނިކޮށެވެ.

ހަތިޔާރު އެޅި ސިފައިންގެ ދޮޅޮހަކަށް މީހުން އިމްރާން ޚާން ގަދަކަމުން ހައްޔަރުކޮށް ކަޅު ކުލައިގެ ވޭނަކަށް އަރުވައިގެން ގެންދާ މަންޒަރު ވަނީ އާންމުވެފަ އެވެ.

ޚާން ހައްޔަރުކުރުމާ ގުޅިގެން ސަޕޯޓަރުން މަގުމައްޗަށް ނުކުތުމުގެ ސަބަބުން ތިން ޕްރޮވިންސެއްގައި ވަނީ އިމަޖެންސީ ހާލަތު އިއުލާންކޮށް އެއްވެ އުޅުން މަނާކޮށްފަ އެވެ. ޚާންގެ ސަޕޯޓަރުން ވަނީ ސަލާމަތީ ބާރުތަކާ ކުރިމަތިލައި ޕޮލިހާއި މިލިޓަރީ ބިލްޑިންތަކަށް ގާ އުކައި މަގުތައް ބަންދުކޮށްފަ އެވެ. ހަމަނުޖެހުންތައް އެންމެ ބޮޑަށް ހިނގަމުން ދަނީ އިސްލާމް އާބާދާއި ލާހޯރާއި ރާވަލްޕިންޑީގަ އެވެ.

ރޮއިޓަސް އިން ޕާކިސްތާނުގެ ޓެލެކޮމިއުނިކޭޝަން މޮނިޓަރިން ބޮޑީއާ ހަވާލާދީ ރިޕޯޓުކޮށްފައިވާ ގޮތުގައި ފޯނާއި އިންޓަނެޓުގެ ޚިދުމަތް ވަނީ ހިފަހައްޓައިފަ އެވެ.

ޚާރިޖީ ވުޒާރާގެ އެންގުމަށް މޮބައިލް ފޯނުގެ ޑޭޓާތައް ކަނޑައިލުމުގެ އިތުރުން ޔޫޓިއުބާއި ފޭސްބުކާއި ޓުވިޓަގެ ޚިދުމަތް ވެސް ވަނީ މެދުކަނޑައިލައިފަ އެވެ.

އިތުބާރު ނެތްކަމުގެ ވޯޓަކުން މިދިޔަ އަހަރު ގައުމުގެ ވެރިކަމުން ދުރުކުރި ފަހުން އިމްރާން ޚާން ގެންދަވަނީ އަލުން އިންތިޚާބު ބޭއްވުމަށް ގޮވައިލައި ސަރުކާރަށް ޕްރެޝަރް ކުރައްވަމުންނެވެ. އެ ހަރަކާތުގެ ތެރޭގައި އުޅުއްވަނިކޮށް ބަޑީގެ ހަމަލާއެއް ވެސް ވަނީ އަމާޒުވެފަ އެވެ. އިއްޔެގެ ހައްޔަރު ކުރުމަކީ އެ ގައުމުގެ ކޮރަޕްޝަނާ ބެހޭ އިދާރާއަށް ހާޒިރު ވެވަޑައިނުގެންނެވުމުގެ ސަބަބުން ކުރެވުނު ހައްޔަރުކުރުމެއް ކަމުގައި އޮފިޝަލުން ބުނެ އެވެ.

އިމްރާން ޚާނުގެ މައްޗަށް ސަރުކާރުން ތުހުމަތު ކުރަނީ ވެރިކަމުގައި ހުންނެވި އިރު ޕްރޮޕަޓީ ޑިވެލޮޕަރެއްގެ އަތުން ކޮރަޕްޝަނުގެ އަމަލެއްގެ ގޮތުގައި ބެލެވޭ ފަދަ އަގު ބޮޑު ބިމެއް ލިބިވަޑައިގެންފައިވާ ކަމުގަ އެވެ.