ރާއްޖޭގައި ތިބި އިންޑިއާ ސިފައިން އަނބުރާ ގެންދިއުމަށް އިންޑިއައިން އެއްބަސްވެއްޖެކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ. ރައީސް މިހެން ވިދާޅުވީ ތުރުކީއާއި ޔޫއޭއީއަށް ކުރެއްވި ދަތުރުފުޅަށްފަހު ރާއްޖެ ވަޑައިގެން ނޫސްވެރިންނަށް މައުލޫމާތު ދެއްވަމުންނެވެ.

ރައީސް ވަނީ ކޮޕް ސަމިޓުގެ ހަވާސާގައި އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވާފައެވެ. އެ ބައްދަލުކުރެއްވުމުގައި މި މައްސަލައަށް މަޝްވަރާކުރެއްވި އެވެ.

ރައީސް މުއިއްޒު ވިދާޅުވީ މިއަދާ ހަމައަށް އައިއިރު އިންޑިއާގެ އެންމެ އިސް ބޭފުޅުންނާއެކު ގިނަ ބައްދަލުވުންތަކެއް ބޭއްވިފައިވާ ކަމަށާއި ރާއްޖޭގައި ތިބި އިންޑިއާ ސިފައިން އަނބުރާ ގެންދަން ރަސްމީކޮށް އެގައުމުގެ ސަރުކާރަށް ވެސް އަންގާފައިވާ ކަމަށެވެ.

"ކުރިން ކުރެވުނު މަސައްކަތާއި މިއަދާ ހަމައަށް ކުރެވުނު ހުރިހާ މަސައްކަތެއްގައި އިންޑިއާ ސަރުކާރުން އަޅުގަނޑުމެންނަށް އެއްބަސްވެފައި ވަނީ އިންޑިއާ ސިފައިން އަނބުރާ ގެންދާނެ ކަމަށް،" ރައީސް ވިދާޅުވި އެވެ.

ރާއްޖޭގައި ތިބި ބޭރު ސިފައިން ބޭލޭނެ ކަމަށާއި މިހާރު ކުރިއަށްގެންދާ ރީތި ޑިޕްލޮމެޓިކް އުސޫލުގެ ތެރެއިން އެކަން ވަރަށް އަވަހަށް ހާސިލުވެގެންދާނެ ކަމަށްވެސް ރައީސް ވިދާޅުވި އެވެ. އަދި ޓެކްނިކަލް ލެވެލެއްގައި ދެ ގައުމުން މިކަމުގައި މަސައްކަތް ކުރެވެމުންދާ ކަމަށްވެސް ރައީސް ވިދާޅުވި އެވެ.

އިންޑިއާ ސިފައިން އަނބުރާ ގެންދަން އެދުމަކީ ރައީސްގެ ރިޔާސީ އެއް ވައުދެވެ. އެ މަނިކުފާނުގެ ވެރިކަމުގެ ފުރަތަމަ 100 ދުވަހުގެ ތެރޭގައި ކުރަން ނިންމާފައިވާ އެންމެ މުހިންމު އެއް ކަމަކީ ވެސް އިންޑިއާގެ ސިފައިން ރާއްޖެ އިން ފޮނުވާލުމެވެ.

މީގެ ކުރިން ސަރުކާރުން ބުނެފައިވަނީ ރާއްޖޭގައި 77 އިންޑިއާ ސިފައިން ތިބި ކަމަށެވެ. ސިފައިން ރާއްޖެއިން ފޮނުވާލުމުގެ މަސައްކަތް އިންޑިއާ ސަރުކާރާ ގުޅިގެން ކުރިއަށް ގެންދާނެ ކަމަށްވެސް ސަރުކާރުން ވަނީ ބުނެފަ އެވެ.