ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު، ހެލްތު މިނިސްޓްރީގެ ވަޒީފާގައި ދެމިހުރުމަށް ސިވިލް ސާވިސް ކޮމިޝަން (ސީއެސްސީ) އާ އެކު ހެދި ކޮންޓްރެކްޓް ބާތިލް ކުރުމަށް ގޮވާލައި އެމްޑީޕީން ރައްޔިތުންގެ މަޖިލިހަށް ކުއްލި މައްސަލައެއް ހުށަހަޅައިފި އެވެ.

މި މައްސަލަ މަޖިލިހަށް ހުށަހެޅީ ދާންދޫ ދާއިރާގެ އެމްޑީޕީގެ މެމްބަރު ޔައުގޫބް އަބްދުﷲ އެވެ.

ސާޖިދާއަކީ ހެލްތު މިނިސްޓްރީގެ ދަށުން ހިންގާ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ސީނިއާ ސައިންޓިފިކް އޮފިސަރެވެ. ފަސްޓްލޭޑީ ކަމަށް ވަޑައިގަތުމަށް ފަހު ސާޖިދާ ވަނީ ސީއެސްސީގެ ވަޒީފާއިން މުސާރަ ނުލިބޭ ގޮތަށް ހަތަރު އަހަރުގެ ޗުއްޓީއެއް ނަންގަވައިފަ އެވެ. ނަމަވެސް ހެލްތު މިނިސްޓްރީން ސާޖިދާގެ ފަންނީ އެހީތެރިކަން ބޭނުންވާ ކަމަށް އެންގުމުން ސީއެސްސީން ވަނީ ކޮންޓްރެކްޓް އުސޫލުން ވަޒީފާ އަދާކުރަން މި މަހުގެ ހަތް ވަނަ ދުވަހު އެއްބަސްވުމެއް ހަދައިފަ އެވެ.

ސީއެސްސީން ސާޖިދާއާއެކު ހެދި ކޮންޓްރެކްޓުގައިވާ ގޮތުން މަސައްކަތަށް ވަޑައިގަންނަވާ ކޮންމެ ގަޑިއިރަކަށް 75ރ. ގެ އެލަވަންސެއް ލިބޭނެ އެވެ. އެއީ މަހަކު 40 ގަޑިއިރު މަސައްކަތްކުރާ ގޮތަށް ކަމަށްވާތީ މަހަކު ލިބިވަޑައިގަންނަވާނީ 3،000ރ. އެވެ. އެއީ މުސާރަ ނުލިބޭ ގޮތަށް އެފަދަ އެގްރިމެންޓެއް ނުހެދޭނެތީ މަސައްކަތަށް ނުކުންނަ ދުވަސްތަކަށް ދޭ މުސާރައެކެވެ.

މި ކޮންޓްރެކްޓުގެ އިތުރުން ފަސްޓްލޭޑީގެ ހައިސިއްޔަތުން ވެސް ސާޖިދާ އަށް ކޮންމެ މަހަކު މުސާރަ ލިބިވަޑައިގެންނަވާތީ ދެ މަގާމެއް އަދާކުރެއްވިދާނެތޯ ބައެއް މީހުން ދަނީ ސުވާލު އުފައްދަމުންނެވެ.

ޔައުގޫބް ހުށަހެޅުއްވި ކުއްލި މައްސަލައިގައި ބުނެފައި ވަނީ ސާޖިދާ، މަގާމުގެ ނުފޫޒު ބޭނުން ކުރައްވައިގެން ގާނޫނާއި ގަވައިދާ ހިލާފަށް ހަތަރު އަހަރުގެ ނޯ ޕޭ ލީވް ނެންގެވުމަށް ނިންމެވުމާ ގުޅިގެން ސިވިލް ސާވިސްގައި މަސައްކަތް ކުރާ 28،000 އަށް ވުރެ ގިނަ މުވައްޒަފުން އެކި ގޮތް ގޮތުން ކަންބޮޑުވުން ފާޅު ކުރަމުންދާ ކަމަށެވެ.

"އެ ކަމަނާ މަގާމުގެ ނުފޫޒު ބޭނުންކުރެއްވުމުގެ ސަބަބުން އެ ކޮމިޝަނަށް މިނިވަންކަމާ އެކު ގޮތް ނިންމުމަށް ނުކުޅެދިފައިވާކަން އެނގެން އޮތް ހިނދު މިއަދު އެ ކަމަނާއަށް ހާއްސަ ކުރައްވައިގެން ސިވިލް ސާވިސް ގަވައިދުގެ ރޫހާ ހިލާފަށް ގަވާއިދު މާނަ ކުރައްވައި، ވަކި ގޮތަކަށް އަމަލު ކުރެއްވުމަކީ ގާނޫނާ ހިލާފު އަމަލެއް،" ޔައުގޫބް ވިދާޅުވި އެވެ.

ޔައުގޫބް ވިދާޅުވީ ދޭދޭ މުވައްޒަފުންނާ ދޭތެރޭގައި ތަފާތުކުރުން ގެންގުޅެގެން ނުވާނެ ކަމަށް އެ ގަވާއިދުގައި ސާފުކޮށް ބަޔާންކޮށްފައިވާއިރު، ސާޖިދާއާ ދޭތެރޭގައި ނިންމަވާފައިވާ ނިންމެވުމަކީ ގަވާއިދާ ހިލާފު ނިންމެވުމެއް ކަމަށެވެ. އަދި ސާޖިދާގެ ނޯޕޭ ލީވް ގަވައިދުގައި ބުނާ ތިން ޝަރުތުން ކުރެ އެއްވެސް ޝަރުތަކަށް ފުރިހަމަ ނުވާ ކަމަށް އެ މައްސަލައިގައިވެ އެވެ.

އެހެންވެ، މުސާރަ ނުލިބޭ ގޮތަށް ޗުއްޓީ ނަންގަވާފައިވަނީ ވެސް ގަވާއިދާ ހިލާފަށް ކަމަށް ކުއްލި މައްސަލައިގައިވެ އެވެ.

"އެ ނިންމެވުމަކީ ގާނޫނާއި ގަވާއިދާ ހިލާފަށް ކަނޑައެޅިގެން ގާނޫނު އަސާސީގެ 17 ވަނަ މާއްދާގެ ހ. އަދި 20 ވަނަ މާއްދާއާ ހިލާފު އަމަލެއް ކަމުގައި ވީހިނދު އެ އިދާރާތަކުން ނިންމަވާފައިވާ ނިންމެވުމާ ގުޅިގެން ގިނަ އަދަދެއްގެ ސިވިލް ސާވަންޓުންނަށް ނަފުސާނީގޮތުން ކުރާ ނޭދެވޭ އަސަރު ބޮޑުވާނެ ކަމަށް ގަބޫލު ކުރަން ޖެހޭ،" ކުއްލި މައްސަލައިގައިވެ އެވެ.

އެހެންވެ، މި މަހުގެ 7 ވަނަ ދުވަހު ސާޖިދާ އާއި ސީއެސްސީއާ ދެމެދު ގާއިމު ކުރި އެއްބަސްވުން ބާތިލް ކުރަން ކުއްލި މައްސަލައިގައި ގޮވާލާފައިވެ އެވެ. ކުއްލި މައްސަލަ އަށް ބަހުސް ކުރަން ފެންނަ ކަމަށް 21 މެމްބަރުން ވޯޓު ދެއްވި އިރު، ބަހުސްކުރަން ނުފެންނަކަމަށް ވޯޓުދެއްވީ އެންމެ ހަތަރު މެންބަރުންނެވެ.