ރައްޔިތުންގެ މަޖިލީސް ހިންގަންވީ ގޮތް އެންގުމުގެ ބާރު ސުޕްރީމް ކޯޓަށް ވެސް ލިބިގެން ނުވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް މިއަދު ވިދާޅުވެއްޖެ އެވެ.

މަޖިލީހުގެ މިއަދުގެ ޖަލްސާގައި އަސްލަމް ވިދާޅުވީ ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ގުނާ ގޮތަށް މަޖިލީހުގެ ގަވާއިދަށް ގެނައި އިސްލާހުތައް ބާތިލްކުރުމަށް ސުޕްރީމް ކޯޓުން ނެރުނު އަމުރާ އެއްގޮތަށް އެކަން ނުކުރެވޭނެ ކަމަށާއި އެ ނިންމުމާ ގުޅިގެން ކަންބޮޑުވެވަޑައިގަންނަވާ ކަމަށެވެ.

އަސްލަމް ވިދާޅުވީ ސްޕްރީމް ކޯޓުން ވަގުތީ އަމުރެއް ނެރެފައި ވަނީ ގާނޫނުއަސާސީއާ ހިލާފުތޯ ނިންމުމެއް ނެތި ކަމަށާއި އެއީ ކަންބޮޑުވާ މައްސަލައެެއް ކަމަށެވެ. އަދި މިއަދުގެ ޖަލްސާ ކުރިއަށް ގެންދެވޭނީ މަޖިލީހުގެ ކޯރަމަކީ ކޮބައިކަން އެނގިގެން ކަމަށް ވިދާޅުވި އެވެ.

ސުޕްރީމް ކޯޓުން އަމުރެއް ނެރެފައި ވަނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ގުނާ ގޮތަށް ގަވާއިދަށް ގެނައި އިސްލާހުތައް ބާތިލް ކުރުމަށް ބަންޑާރަ ނައިބުގެ އޮފީހުން ހުށަހެޅި މައްސަލާއަކާ ގުޅިގެންނެވެ.

ކޯޓުން އެގޮތަށް އެންގީ ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ގުނާ ގޮތަށް ގަވާއިދަށް ގެނައި އިސްލާހުތައް ބާތިލް ކުރުމަށް ބަންޑާރަ ނައިބުގެ އޮފީހުން ސުޕްރީމް ކޯޓަށް ހުށަހެޅި މައްސަލާގައި ނެރުނު ވަގުތީ އަމުރުގަ އެވެ. ސުޕްރީމް ކޯޓުގެ އަމުރުގައި ބުނެފައި ވަނީ މަޖިލީހުގެ ގަވައިދަށް ގެނައި އިސްލާހުތަކަކީ ގާނޫނުއަސާސީގެ މާއްދާތަކާ ހިލާފު އިސްލާހުތަކެއް ކަމަށް ދައުލަތުން ބުނާއިރު، އެ މާއްދާތަކަށް އަމަލު ކުރުން މަޑުޖައްސާލަން ޖެހޭ ކަމަށެވެ.

ރައީސުލް ޖުމްހޫރިއްޔާ އާއި ރައީސުލް ޖުމްހޫރިއްޔާގެ ނައިބު މަގާމުން ވަކިކުރެވޭނެ ކަމަށް ގާނޫނު އަސާސީގައި ބުނަނީ މަޖިލީހުގެ ޖުމްލަ މެންބަރުންގެ ތިން ބައި ކުޅަ ދެ ބައި މެމްބަރުންގެ އަޣުލަބިއްޔަތު ވޯޓުން ކަމަށެވެ. މި ހިނގާ 19 ވަނަ މަޖިލީހުގެ ޖުމްލަ މެންބަރުންގެ އަދަދަކީ 87 އެވެ. ނަމަވެސް އާ ސަރުކާރުގެ ވަޒީރުކަމުގެ މަގާމުތަކަށާއި ކުންފުނިތަކުގެ ވެރިންގެ ގޮތުގައި މަޖިލީހުގެ ހަތް މެންބަރަކު ވަނީ ވަޑައިގެންފަ އެވެ. އެހެންވެ އެ ގޮނޑިތައް ހުސްވުމުން މަޖިލީހުގެ ޖުމްލަ މެންބަރުންގެ އަދަދަކީ 80 އަށް މަޖިލީހުން ފާސްކުރި އިސްލާހުގައިވެ އެވެ.

މަޖިލީހުން ފާސްކުރި އިސްލާހުގައިވާ ގޮތުން އެމްޑީޕީ އާއި ޑިމޮކްރެޓްސްގެ މަޖިލީސް މެންބަރުންގެ ވޯޓުން ރައީސް އާއި ނައިބް ރައީސް އަޒުލްކުރެވެ އެވެ.

އެ މައްސަލައިގައި ސުޕްރީމް ކޯޓުން ނެރުނު ވަގުތީ އަމުރެއްގައި ވަނީ އެ ގަވާއިދަށް އަމަލުކުރުން މަޑުޖައްސައިލަން ވަގުތީ އަމުރެއް ނެރުއްވައިފަ އެވެ. އެކަމަކު، އަސްލަމް ވިދާޅުވީ، އެ އަމުރަށް އަމަލުކުރުމާ މެދު ގޮތެއް ނިންމާނީ މަޖިލީހުގެ މެންބަރުން ކަމަށެވެ. އަދި ވިދާޅުވީ އެއީ މުޅި މަޖިލީހުގެ މަސައްކަތާ ގުޅޭ ކަމަކަށްވާތީ ގާނޫނުއަސާސީގެ ތަރަހައިގެ ތެރެއިން އެކަމަކީ ކޮންމެހެން ނިންމަން ޖެހޭ ކަމެއް ކަމަށެވެ.