ވެލާނާ އިންޓަނޭޝަނަލް އެއާޕޯޓް ތެރޭގައި އެތަނުގެ ދެ މުވައްޒަފަކަށް ހަމަލާދިން ބިދޭސީ މީހާ 10،800ރ. އިން ޖޫރިމަނާ ކުރަން ކްރިމިނަލް ކޯޓުން މިއަދު ހުކުމްކޮށްފި އެވެ.

މިމަހުގެ ހަތް ވަނަ ދުވަހު އެމެރިކާގެ ރައްޔިތެއް ކަމަށްވާ ހަޑަޑް ވިސާމް އެއާޕޯޓުގައި ފުރަން ގޮސް އެއާޕޯޓްގެ ދެ މުވައްޒަފަކަށް ހަމަލާދިން މައްސަލާގައި ހަޑަޑްގެ މައްޗަށް ދައުލަތުން ކުރީ އަނިޔާއެއް ދިނުމުގެ ދައުވާ އާއި ގައިގައި އަތްލުމުގެ ދައުވާ އެވެ.

އެ ދެ ދައުވާއަށް އޭނާ ކްރިމިނަލް ކޯޓުގައި މިއަދު އިއުތިރާފްވި އެވެ. އަދި ދައުލަތާ އެކު ހެދި އިއުތިރާފް އެއްބަސްވުމެއްގެ ދަށުން, ގައިގައި އަތްލުމުގެ ދައުވާގައި 3،600ރ. އިން ޖޫރިމަނާ ކުރުމަށް އަދި އަނިޔާއެއް ދިނުމުގެ ދައުވާގައި 7،200ރ. ގެ ޖޫރިމަނާ ކުރަން ދައުލަތުން ވަނީ އެއްބަސްވެފަ އެވެ.

އެ އެއްބަސްވުމާ އެއްގޮތަށް އޭނާ ކޯޓުގައި ކުށަށް އިއުތިރާފްވުމުން އެއްބަސްވުމާ އެއްގޮތަށް އޭނާ 10،800ރ. އިން ޖޫރިމަނާކޮށް، އެ ފައިސާ މިއަދުން ފެށިގެން އެއް މަސް ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ދައްކަން ހުކުމުގައި އަންގާފައިވެ އެވެ.

އެ މައްސަލާގައި ހަޑަޑް ހައްޔަރު ކުރި ނަމަވެސް މައްސަލަ ނިމެންދެން ރާއްޖެއިން ބޭރަށް ފުރުން މަނާކޮށް އޭނާ ހުރީ ބަންދުން ދޫކޮށްލައިފަ އެވެ.