ނިއު ޔޯކް (މެއި 31) - އެމެރިކާގެ ރިޔާސީ އިންތިޚާބުގައި ކެންޑިޑޭޓުން ޚަރަދު ކުރަން އޮންނަ އުސޫލާ ޚިލާފަށް އޮޅުވާލައިގެން ޚަރަދުކުރިކަން ކުރީގެ ރައީސް ޑޮނަލްޑް ޓްރަމްޕުގެ މައްޗަށް ނިއު ޔޯކުގެ 12 ޖޫރީން ރޭ ކުރި ހުކުމަށް ފަހު އެމަނިކުފާނަށް ޖަލު ހުކުމެއް އަތުވެދާނެތޯ ބައެއް މީހުން ސުވާލު ކުރެ އެވެ.

ޓްރަމްޕުގެ މައްޗަށް ހުކުމް އިއްވުން އޮނާނީ ޖުލައި 11 ވަނަ ދުވަހު އެވެ. ގާނޫނީ ތަޖުރިބާކާރުން ބުނާ ގޮތުގައި ޓްރަމްޕް ކުށްވެރިވި ނަމަވެސް ޖަލު ހުކުމެއް އިއްވުން ދުރުކަމަށެވެ. ޓްރަމްޕުގެ މައްޗަށް ސާބިތުވި 34 ދައުވާ އަކީ ވެސް ނިއު ޔޯކުގައި ކުށުގެ ކުޑަބޮޑުމިން ބަލާ މިންގަނޑުން އެއީ އީ ކްލާހުގެ ކުށްތަކެކެވެ. ނުވަތަ އެއީ އެންމެ ދަށް ކެޓަގަރީ އެވެ. ގާނޫނުގައިވާ ގޮތުން މިއިން ކޮންމެ ކުށަކަށް ގިނަވެގެން ހަތަރު އަހަރުގެ ޖަލު ހުކުމެއް އިއްވިދާނެ އެވެ.

އެހެންކަމުން ޓްރަމްޕުގެ މައްޗަށް ފަނޑިޔާރު އިއްވާނީ ލުއި އަދަބެއް ކަމަށް ބެލެވެ އެވެ. ޓްރަމްޕަށް މިހާރު 77 އަހަރުވެފައިވާ އިރު ޓްރަމްޕުގެ އުމުރާއި ކުރިން ޖިނާއީ ކުށެއް ކޮށްފައި ނެތުން ފަދަ ކަންކަމަށް ހުކުމްކުރާއިރު ބަލާނެ އެވެ. އަދި ޓްރަމްޕުގެ މައްޗަށް ސާބިތުވެފައި ވަނީ މުޅިން ވެސް ނަން-ވައިލެންސް ކުށްތަކެވެ.

ޓްރަމްޕަކީ އެމެރިކާގެ ކުރީގެ ރައީސަކަށްވުމާއި މިހާރުގެ ރިޔާސީ ކެންޑިޑޭޓަކަށްވުމަކީ ވެސް ހުކުމް އިއްވުމުގައި ރިއާޔަތް ކުރާނެ ކަންކަން ކަމަށް ގާނޫނީ މާހިރުން ބުނެ އެވެ.

ޓްރަމްޕް ޖަލަށްލައިފި ނަމަ އެހެން އުނދަގޫތަކެއް ވެސް ދިމާވެދާނެ އެވެ. ޓްރަމްޕަކީ ކުރީގެ ރައީސަކަށްވުމުން އެމެރިކާގެ ސީކްރެޓް ސާވިސް އިން އުމުރު ދުވަހަށް ޓްރަމްޕަށް ސެކިއުރިޓީ ދޭނެ އެވެ. އޭގެ މާނައަކީ ޓްރަމްޕް ޖަލަށް ވައްދައިފި ނަމަ ސީކްރެޓް ސާވިސްގެ އެޖެންޓުން އަބަދުވެސް ޖަލުގައި ތިބެން ޖެހޭނެ ކަމެވެ. އެހެންވެ ކުރީގެ ރައީސަކު ގައިދީއެއްގެ ގޮތުގައި ޖަލުގައި ބަހައްޓައިގެން ޖަލުގެ ނިޒާމް ހިންގުމަކީ ފަސޭހަ ކަމެއް ނޫނެވެ. ޓްރަމްޕަށް ސަލާމަތާއި ރައްކާތެރިކަން ޖަލުގައި ދިނުމަކީ ސެކިއުރިޓީ ބޮޑު ރިސްކެއްގެ އިތުރުން އެތައް ޚަރަދެއް ވެސް ހިނގާނެ ކަމެކެވެ.

ޓްރަމްޕުގެ މައްޗަށް ކުށް ސާބިތުވި ނަމަވެސް ރިޔާސީ އިންތިޚާބުގައި ވާދަކުރުމަށް ހުރަހެއް ނެތެވެ. ޖަލަށްލައިފި ނަމަ ޖަލުގައި ހުންނަވައިގެން ވެސް އިންތިޚާބުގައި ވާދަކުރެވޭނެ އެވެ.