އެމްއެމްޕީއާރްސީން ޚިޔާނާތްވި ފައިސާ ހޯދައި އެކަމުގައި ކުށްވެރިވާ މީހުންނަށް ހައްގު އަދަބު ދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ޕީއެންސީގެ ޖަގަހައިގައި މިރޭ ބޭއްވި ޖަލްސާގައި ރައީސް ވިދާޅުވީ އެމްއެމްޕީއާރްސީގެ ހިޔާނާތުގައި ބައިވެރިވީ ކޮންމެ މީހަކު ކަމުގައި ވިޔަސް އެ މީހަކަށް ދޭންޖެހޭ ހައްގު އަދަބު މި ސަރުކާރުން ދޭނެ ކަމަށެވެ.

އެމްއެމްޕީއާރްސީގެ މައްސަލަ މީގެތެރެއިން އެންމެ ބޮޑު މައްސަލައަކީ. އެ ވައްކަން ކުރި ފަރާތްތައް. ދެނެގަނެ އެއީ ކޮންމެ މީހަކު ކަމުގައި ވިޔަސް އެ މީހަކަށް ދޭންޖެހޭ ހައްގު އަދަބު މި ސަރުކާރުން ދީ އެ ފައިސާ ރައްޔިތުންނަށް ހޯދައިދިނުމަށްޓަކައި ކުރަންޖެހުނު ކޮންމެ ކަމެއް ކުރާނަން،" ރައީސް ވިދާޅުވި އެވެ.

އެމްއެމްޕީއާރްސީގެ ފައިސާގެ އިތުރުން ވެސް ދައުލަތުން ގެއްލިފައިވާ ފައިސާ ހޯދުމަށް މަގުފަހިކުރުމުގެ ގޮތުން އެސެޓް ރިކަވަރީގެ ގާނޫނެއް ވުޖޫދުކުރުމަށްޓަކައި ރައްޔިތުންގެ މަޖިލީހަށް ހުށަހަޅުއްވާނެ ކަމަށް އެމަނިކުފާނު ވިދާޅުވި އެވެ.

އެ ގާނޫނު ބައްޓަންކުރާނީ ރާއްޖެއިން ބޭރުގައި ފޮރުވާފައިވާ ޚިޔާނާތުގެ ފައިސާ ހޯދުމަށް ވެސް ފަސޭހަވާނެ ގޮތަށް ކަމަށް ރައީސް ވިދާޅުވި އެވެ.

"ހަމައެއާއެކީގައި ރައްޔިތުންގެ ފައިސާ އިން ގެއްލިފައިވާ ފައިސާ ވެސް ހޯދަން އެބަޖެހޭ. ކޮރަޕްޝަންގެ އެކި ކަހަލަ ނުބައި އަމަލު ހިންގައިގެން ރައްޔިތުންގެ ފައިސާ އިން ކޮށްފައިވާ ވައްކަންތައް ބަލައި ހަގީގީ އިޚްލާސްތެރިގޮތެއްގައި އެކަންކަން ކުރި ފަރާތްތަކަށް ދޭންޖެހޭ އަދަބު ދީ، އެ އެސެޓްތައް ރިކަވާ ކުރެވެންޖެހޭ. މިއީ އަބަދާއި އަބަދު ދައްކާ ވާހަކައަކަށް ނޫނިއްޔާ ދަޅައެއްގެ ގޮތައި ވާކަމަކަށް ނުވެ...،"

އެމަނިކުފާނު ވިދާޅުވީ ދައުލަތުން ގެއްލުނު ފައިސާ ހޯދުމަށްޓަކައި ކޮންމެ ފަހަރަކު ރިޔާސީ ކޮމިޝަނެއް ހަދަނީ ކަމަށާއި ނަވެސް ނަތީޖާއެއް ނުނެރެވޭ ކަމަށެވެ. އެކަމަކު އެސެޓް ރިކަވަރީގެ ގާނޫނާއެކު އެކަން ކުރެވޭނެ ކަމަށް ރައީސް ވިދާޅުވި އެވެ.

ރައީސް މިފަދައިން ވިދާޅުވިއިރު، އެމްއެމްޕީއާރްސީގެ ޚިޔާނާތުގެ ފައިސާއިން މަންފާ ލިބުނު ކަމަށް ތުހުމަތު ކުރެވޭ ބޭފުޅުން ޕީއެންސީގެ މަޖިލިސް މެމްބަރުންގެ ތެރޭގަ އާއި ސަރުކާރުގެ އެކި މަގާމްތަކުގައި އެބަތިއްބެވެ.