"ބިންވެރިޔާ" ސްކީމްގެ ދަށުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ގަވާއިދާ ހިލާފަށް ގޯތީގެ މުއާމަލާތް ހިންގީ ހައުސިން މިނިސްޓްރީގެ ވަރަށް ބޮޑު ދައުރެއް އޮވެގެން ކަމަށާއި އެހެންވެ ހައުސިން މިނިސްޓަރު ޑރ. އަލީ ހައިދަރު ވެސް މަގާމުން ސަސްޕެންޑް ކުރަން އިދިކޮޅު މައި ޕާޓީ އެމްޑީޕީން އިން ގޮވާލައިފި އެވެ.

އެޗްޑީސީގެ "ވަގު" މުއާމަލާތާ" ގުޅިގެން އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ މި މައްސަލަ އަކީ ހައިދަރު މަގާމުން އިސްތިއުފާ ވެސް ދެއްވަން ޖެހޭ ވަރުގެ ބޮޑު ކަމެއް ކަމަށެވެ.

"ހައިދަރުގެ އިސްތިއުފާއަށް އަޅުގަނޑު ގޮވާލަން ވަގުތުން ވަގުތަށް. ރައީސް ޖެހޭނެ އޭނަ ސަސްޕެންޑު ކުރައްވަން ވެސް މައްސަލަ ބަލާ ނިމެންދެން." އޭނަ ވިދާޅުވި އެވެ.

އަކްރަމް ވިދާޅުވީ ގޯތިތަކުގެ ޕްލޮޓް ނަންބަރުތައް އެޗްޑީސީއަށް އެނގޭނީ އެ ނަންބަރުތައް ހައުސިން މިނިސްޓްރީން ހިއްސާ ކުރުމުން ކަމަށް ގަބޫލު ކުރެވޭ ކަމަށާއި "ބިންވެރިޔާ" ސްކީމުން މި ސަރުކާރުން ހިންގި ވައްކަމުގެ ހުރިހާ ތަފްސީލެއް ވެސް ހައުސިން މިނިސްޓްރީ އަށް އެނގޭނެ ކަމަށެވެ.

އޭނަ ވިދާޅުވީ ހައުސިން މިނިސްޓްރީއަށް މިކަމުގެ ހުރިހާ ތަފުސީލެއް އެނގި އެކަމާއި ފިޔަވަޅު ނޭޅުމުން ސުވާލު އުފެދޭ ކަމަށާއި އެކަމުގެ ޒިންމާ އެޗްޑީސީގެ އެމްޑީ އިބްރާހިމް ފަޒުލް ރަޝީދުގެ އިތުރުން އިތުރު ބޭފުޅުން ވެސް ނަންގަވަން ޖެހޭ ކަމަށެވެ.

އަކްރަމް ވިދާޅުވީ މި މައްސަލައިގައި ސަރުކާރުން ފިޔަވަޅު ނާޅައި އިހުމާލުވާ ނަމަ ސަރުކާރަށް ދެކޮޅަށް މަގުމައްޗަށް ސީދާ ހަރަކާތަށް ވެސް ނުކުންނާ ކަމަށެވެ.