2001 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހު އެމެރިކާގެ ނިއުޔޯކުގައި ހުންނަ ވޯލްޑް ޓްރޭޑް ސެންޓަރަށް ދިން ހަމަލާއަކީ މުޅި ދުނިޔެ ސިއްސުވާލި ހަމަލާއެކެވެ.

ކުޑަ ވަގުތު ކޮޅެއްގެ ތެރޭގައި އެ ހަބަރު މުޅި ދުނިޔެއަށް ފެތުރި ހަމަލާގެ ވީޑިއޯތައް އޭރުގެ މީޑިއާ ވަސީލަތްތައް މެދުވެރިކޮށް ހަލުވިކަމާއެކު ދައުރުވާން ފެށި އެވެ.

އޭގެ ފަހުން 23 އަހަރު ވެފައިވާއިރު އެ ހަމަލާގެ މަންޒަރު ދައްކުވައިދޭ މުޅިން އާ ވީޑިއޯއެއް ވަނީ މިދިޔަ އަހަރުގެ ތެރޭގައި އާއްމުވެފަ އެވެ.

https://www.youtube.com/watch?v=MM9h60AesrI

މީގެ ކުރިން ފެނިފައިނުވާ "އޭންގަލް"އަކުން ނަގާފައިވާ އެ ވީޑިއޯއިން އެ ނުރައްކާތެރި ހަމަލާގެ މަންޒަރު މުޅިން ތަފާތު ގޮތަކަށް ދައްކުވައިދެ އެވެ.

ކެއި ސުގިމޮޓޯ ނަމަކަށް ކިޔާ އަމިއްލަ ފަރާތަކުން މިދިޔަ އަހަރުގެ ޖުލައި މަހު ޔޫޓިއުބަށް އަޕްލޯޑުކުރި އެ ވީޑިއޯއަކީ އޭނާގެ އަލަމާރީގައި އޮތް ވީޑިއޯ ޓޭޕެއްގައި ރައްކާ ކުރެވިފައިވާ ވީޑިއޯއެއް ކަމަށް ކެއި ބުންޏެވެ.

ޖުމްލަ 3000 އަށްވުރެ ގިނަ މީހުން މަރުވެ އުމްރާނީ އެތައް ގެއްލުންތަކެއް ލިބުނު އެ ހަމަލާއަކީ ދުނިޔޭގެ ތާރީހުގައި ހިނގާފައިވާ އެންމެ ނުރައްކާތެރި އެއް ހަމަލާ އެވެ.