އެމެރިކާގައި ޓިކްޓޮކް މަނާ ކުރުމާއެކު އެމެރިކާއާއި ދުނިޔޭގެ ވެސް އެންމެ ބޮޑު އެއް މަހުޖަނު އިލަން މަސްކް އެ ކުންފުނި ގަނެފާނެ ކަމަށް އަޑުތައް އަރައިފި އެވެ.

މި އަޑުތައް ގަދަވެފައި މިވަނީ އެރެގިކާގެ ގައުމީ ސަލާމަތަށް ނުރައްކާވާ ކަމަށް ބުނެ މިމަހުގެ 19އިން ފެށިގެން އެގައުމުގައި ޓިކްޓޮކް ބޭނުން ކުރުން މަނާކުރަން ފާސްކޮށްފައި ވަނިކޮށެވެ.

އެހެން ނަމަވެސް އެ ނިންމުމުގެ އަސްލު މަގްސަދަކަށް ވަނީ ޓިކްޓޮކްއަކީ ޗައިނާގެ ކުންފުންޏަކަށް ވުމާއެކު ޗައިނާއަށް ދަތިކުރުމުގެ ފިޔަވަޅު އެޅުން ކަމަށް ގިނަ ބަޔަކު ގަބޫލު ކުރެ އެވެ.

އެހެން ކަމުން އިލަން މަސްކް ޓިކްޓޮކް ގަނެފި ނަމަ އެ ކުންފުނީގެ މިލްކިއްޔާތު އެމެރިކާއަށް ބަދަލުވެ ޓިކްޓޮކް މަނާކުރަން އެމެރިކާ ސަރުކާރުން ދައްކާ ބަހަނާގެ އަގު ވެއްޓުނީ އެވެ.

އިލަން މަސްކް ވަނީ މީގެ ކުރިން ޓްވިޓާ ވެސް ގަނެ އެ ކުންފުނީގެ ނަން "އެކްސް"އަށް ބަދަލުކޮށްފަ އެވެ. އެހެން ނަމަވެސް އޭނާ ޓިކްޓޮކް ގަންނަން އުޅޭކަމުގެ ޔަގީންކަން އެއްވެސް ފަރާތަކުން ދީފައެއް ނުވެ އެވެ.

އޭގެ ބަދަލުގައި ޓިކްޓޮކްއިން ބުނެފައިވަނީ އިލަން އެ ކުންފުނި ގަންނަން އުޅޭ ކަމަށް ބުނެ ދެކެވޭ ވާހަކަތަކަކީ އެއްވެސް ހަގީގަތެއް ނެތް "ފުލޯކު" ވާހަކަތަކެއް ކަމަށެވެ.