ރ. ފައިނުގައި އެއާޕޯޓް އެޅުމުގެ މަސައްކަތް އަންނަ ފެބްރުއަރީ މަހު އެމްޓީސީސީއާ ހަވާލުކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ފައިނު ރައްޔިތުންނާ މިއަދު ބާއްދަލުކުރައްވައި ރައީސް ވިދާޅުވީ މިއީ ފަތުރުވެރިކަމުގެ ސިނާއަތަށް ކުރެވޭ އިންވެސްޓްމަންޓަކަށް ވެގެންދާނެ ކަމަށެވެ. ދެން އެރަށަށް ވަޑައިގަންނަވަން އުންމީދުކުރައްވަނީ އެއާޕޯޓު ހުޅުވުމަށްކަމަށްވެސް އެމަނިކުފާނު ވިދާޅުވިއެވެ.

ރ. ފައިނުގައި އެއާޕޯޓަކާއި ސިޓީ ހޮޓަލަކާ އެކު ބޮޑު މަޝްރޫއެއް ކުރިއަށްގެންދަން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އައިލެންޑް އޭވިއޭޝަނާ ހަވާލުކޮށްފައިވެއެވެ.

މި ޕްރޮޖެކްޓުގެ ދަށުން އެއާޕޯޓާ އެކު ދެ ސިޓީ ހޮޓަލާއި މެޑިކަލް ސެންޓަރަކާއި ބައެއްކަހަލަ ސާޖަރީތަކުން ރިކަވާ ވާ މީހުންނަށް ހިދުމަތްދޭ ފެސިލިޓީއަކާއި އައިލެންޑް އޭވިއޭޝަންގެ މަތިންދާބޯޓުތަކަށް ހިދުމަތް ދޭނެ ހޭންގަރަކާއި ސްޓާފުން ޓްރެއިން ކުރާނެ ތަނެއް ހަދާނެ ކަމަށް އޭރު ޓޫރިޒަމް މިނިސްޓްރީން ބުނެފައިވެއެވެ. އެއާޕޯޓްގައި ދެ ބުރިއަށް ހަދާ އިމާރާތުގެ ދެމަތީ ބުރީގައި ހުންނާނީ ލައުންޖްތަކާއި ކެފޭ އަދި ރެސްޓޯރެންޓްތައް ކަމަށް އޭރު ސަރުކާރުން ބުނެފައިވެއެވެ.

ނަމަވެސް އެރަށުގައި އެއާޕޯޓް އެޅުމަކީ ތިމާވެށީގެގޮތުން ބަލާއިރު، އެރަށަށް ބޮޑު ގެއްލުމެއް ލިބޭނެ ކަމެއްކަމަށް ބުނެ ބޮޑު ކެމްޕޭނެއް ކުރިއަށްގެންގޮސްފައިވެއެވެ. އެކަންކަމުގެ މައްޗަށް ރިއާޔަތްކޮށް ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ވަނީ އެރަށުގައި އެއާޕޯޓް ނާޅަން ނިންމާފައެވެ.

ފައިނުގެ ބަދަލުގައި ރ. އަތޮޅުގެ ދެކުނު ބިތުގައި އެއާޕޯޓް އަޅާނީ ބެރިއަންފަރުގައި ކަމަށް ކަނޑައަޅައި 4 ޖޫން 2023 ވަނަ ދުވަހު ރައީސް ސޯލިހު އެކަން އިއުލާންކުރައްވާފައިވެއެވެ.