އިންސާނުންގެ ނޭފަތުގެ އިތުރުން ދޫ މެދުވެރިކޮށް ވެސް ވަސް ދެނެގަނެވިދާނެ ކަމަށް އާ ދިރާސާއަކުން ހާމަވެއްޖެ އެވެ.

އެމެރިކާގެ ޕެންސިލްވޭނިޔާ ސްޓޭޓުގެ ފިލަޑެލްފިޔާގައި ގާއިމުކުރެވިފައިވާ މޮނެލް ކެމިކަލް ސެންސަސް ސެންޓަރުގެ ތަހުލީލުތަކުން މިކަން ސާބިތުވެފައިވެ އެވެ.

މި ދިރާސާގެ ހޯދުންތަކުން ދައްކާ ގޮތުގައި، ކޮންމެ މީހެއްގެ ދުލުގައި ވެސް ވަސް ވަޒަންކުރުމުގެ ގާބިލުކަން ލިބިފައިވާ ނިޒާމެއް ވުޖޫދުވެފައިވެ އެވެ. މީގެ އިތުރުން، ނޭވާލުމުގެ ނިޒާމާއި ރަހަ ތަފާތުކުރުމުގެ ނިޒާމަކީ އެއްބަނޑު އެއްބަފާ ދެ ކަނބަލުންނެކޭ އެއްފަދައިން ގުޅިލާމެހިފައިވާ ދެ ނިޒާމެއްކަން މި ދިރާސާއިން ހާމަވެފައިވެ އެވެ.

މި ދެ ނިޒާމު އެއްކޮށްލައި، އޭގެ މަޢުލޫމާތު މުޅި ހަށިގަނޑަށް ފޯރުކޮށްދިނުމުގެ މަސައްކަތް ކުރަނީ ސިކުނޑިންކަން ދިރާސާގެ ނަތީޖާތަކުން ދައްކަ އެވެ. އެކި ބާވަތުގެ ވަސްތަކާ ގުޅުންހުރި މަޢުލޫމާތު ނޭވާލާ ނިޒާމު މެދުވެރިކޮށް ސިކުނޑިއަށް ރައްދުކުރެވޭއިރު، ދުލުގެ އެންމެ މަތީ ފަށަލާގައި ވެސް ވަސް ދެނެގަތުމުގެ ހާއްސަ ނިޒާމެއް ހިމެނިފައިވާކަން މި ދިރާސާއިން ހާމަކޮށްދެ އެވެ.

މި އައު ހޯދުން ޔަގީންކުރުމަށްޓަކައި، ތަހުލީލު ކުރި ފަރާތްތަކުން ވަނީ އިންސާނުންގެ ރަހަ ތަފާތުކުރުމުގައި މަސައްކަތްކުރާ ސެލްތައް ވަކިން ނަގައި، އެ ސެލްތަކުގެ ހަރަކާތްތައް ގާތުން ދިރާސާކޮށްފަ އެވެ. މި ގޮތުން ކުރެވުނު ތަހުލީލުތަކުން އެނގިފައިވަނީ، ދުލުގެ މަތީ ފަށަލައިގައި ހުންނަ ސެލްތަކުގައި ގިނަ އަދަދެއްގެ މުހިންމު މޮލެކިއުލްތައް އެކުލެވިގެންވާ ކަމެވެ. އަދި މީގެ ތެރޭގައި ވަސް ދެނެގަތުމުގެ ނިޒާމުގައި ޚާއްޞަ ދައުރެއް އަދާކުރާ "އޮލްފެކްޓަރީ ސެލްސް" ހިމެނޭކަން ވެސް އެނގިފައިވެ އެވެ.