ސިކުނޑިން ހޭލުންތެރިކަން ކޮންޓްރޯލްކުރާ ގޮތް ދެނެގަތުމަށް އާ ދިރާސާއެއް ހަދައިފި އެވެ.

ނިއުރޯ ސައިންޓިސްޓުން ވަނީ ފުރަތަމަ ފަހަރަށް މީހަކު އަމިއްލަ ވިސްނުމާމެދު ހޭލުންތެރިވާއިރު ސިކުނޑީގެ އެހެނިހެން ބައިތައް ހަރަކާތްތެރިވާ ގޮތް ހޯދާފަ އެވެ. އަދި ސިކުނޑީގެ އެތެރޭގައިވާ އޮނިގަނޑުތަކުގެ ބައިވެރިވުން ދެނެގަތުމަކީ މާ އުނދަގޫ ކަމެއްކަމަށް ހޯދުންތެރިން ބުނެ އެވެ. އެއީ އެ ތަންތަނަށް ވާސިލުވެވެނީ ހަށިގަނޑަށް ގެއްލުންދޭ ސާޖަރީއެއް މެދުވެރިކޮށް އެކަނި ކަމަށްވާތީ އެވެ.

މި ކޮންސެޕްޓް ޖަނަވާރުންގެ ކިބައިން ޓެސްޓްކުރުމަށް ތަޖުރިބާތައް ފަރުމާކުރުމަކީ ވެސް އުނދަގޫ ކަމެކެވެ. ނަމަވެސް މި ސަރަހައްދުތައް ދިރާސާކުރުމުން، ސިކުނޑީގައިވާ، ހޭލުންތެރިކަމާ ބެހޭ ސަރަހައްދާ ގުޅޭ ހޯދުންތައް ފުޅާކުރެވޭނެ ކަމަށް ދިރާސާވެރިން ބުނެ އެވެ.

އެގޮތުން ހޯދުންތެރިންގެ ދިރާސާގައި ބައިވެރިވީ ބޮލުގައި ރިއްސުމުގެ ފަރުވާ ހޯދަމުންދިޔަ ބައެކެވެ. އެމީހުންގެ ސިކުނޑިއަށް އިލެކްޓްރޯޑްތަކެއް ވައްދާފައި ހުރުމުން، ސިކުނޑީގެ ސިގްނަލްތައް ދިރާސާކުރެވުނެވެ. އެއަށްފަހު ބައިވެރިންނަށް ސްކްރީނެއްގައި އައިކަނެއް ފެންނަ ވަގުތު ފާހަގަކުރަން އެންގުނެވެ.

މި މަސައްކަތްތައް ކުރިއަށްދަނިކޮށް، ދިރާސާވެރިންނަށް ވަނީ ސިކުނޑީގެ އެކި ސަރަޙައްދުތަކުގައި، ނިއުރަލް ހަރަކާތްތައް ރެކޯޑުކޮށްފަ އެވެ. މިއީ ހޭލުންތެރިކަމުގެ ސައިންސްއާ ގުޅުންހުރި މަސައްކަތެއް ކުރަމުންދާ މީހުންގެ ކިބައިން މިފަދަ އެއްފަހަރާ ރެކޯޑިންތައް ނެގުނު ފުރަތަމަ ފަހަރެވެ.

އޮސްޓްރޭލިއާގެ ސިޑްނީ ޔުނިވާސިޓީގެ ސިސްޓަމްސް ނިއުރޯސައިންޓިސްޓް ކްރިސްޓޮފާ ވައިޓް ވިދާޅުވި ގޮތުގައި މި މަސައްކަތަކީ ވަރަށް ފާހަގަކޮށްލެވޭ މަސައްކަތެކެވެ. އެއީ މި މަސައްކަތުން ޓީމަށް އެކި ސަރަޙައްދުތަކުގައި ނިއުރަލް ހަރަކާތްތަކުގެ ވަގުތު ތަފާތުވާ ގޮތް ބެލުމުގެ ފުރުސަތު ލިބުމުންނެވެ.