ހަޔާ އެޑިއުކޭޝަން މިނިސްޓްރީގެ ހިދުމަތްތަކާމެދު ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމް ވަރަށް ބޮޑަށް ފާޑުވިދާޅުވެއްޖެ އެވެ.

މެންބަރު މީކާއީލް ފާޑު ވިދާޅުވީ ރައީސް ޑރ. މުހައްމަދު މުއިއްޒު އިނގިރޭސިވިލާތަށް ވަޑައިގެން އެ ގައުމުގައި ކިޔަވާ ދިވެހި ދަރިވަރުންނާ ބައްދަލުކުރައްވައި، މިނިސްޓްރީގެ ހިދުމަތްތައް ރަނގަޅުކުރައްވާނެ ކަމަށް ވިދާޅުވުމާ ގުޅިގެންނެވެ. އެގޮތުން ހަޔާ އެޑިއުކޭޝަން މިނިސްޓްރީ އިން ދަރިވަރުންނަށް ޖަވާބު ނުދޭކަން ރައީސްއަށް އެނގިވަޑައިގަތީ އަދި ކިރިޔާތޯ މެމްބަރު މީކާއީލް ސުވާލުކުރެއްވި އެވެ.

މީގެ އިތުރުން، މެންބަރު މީކާއީލްގެ ބަސްފުޅުން ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރުގެ މަސައްކަތްތަކާމެދު ހިތްހަމަނުޖެހޭކަން ފާޅުކުރައްވާފައިވާއިރު، މިނިސްޓަރުގެ މަގާމަށް ބަދަލެއް ގެނައުމަށް މެންބަރު ދެކެވަޑައިގަންނަވާ ކަމަށް ވިދާޅުވެފައިވެ އެވެ.

ރައީސް އިނގިރޭސިވިލާތައް ކުރެއްވި ދަތުރުފުޅުގައި އެމަނިކުފާނު ވަނީ، އެ ގައުމުގައި ކިޔަވަން ތިބި ދިވެހި ދަރިވަރުންނާ ބައްދަލުކުރައްވައި ދަރިވަރުންނަށް ދިމާވެފައިވާ ދަތިތައް ބައްލަވާފަ އެވެ.

އެގޮތުން ދަރިވަރުން ހަޔަ އެޑިއުކޭޝަން މިނިސްޓްރީއަށް ފޮނުވާ މެއިލްތަކަށް މިނިސްޓްރީން ޖަވާބު ނުދޭ މައްސަލަ ވަރަށް ގިނައިން ލިބިވަޑައިގަންނަވާކަން ފާހަގަކޮށްފައިވާއިރު، އެކަމަށް ހައްލު ހޯއްދަވާދެއްވާނެ ކަމުގެ ޔަގީންކަން ރައީސް ދެއްވާފައިވެ އެވެ.