ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ފާތިމަތު ސައުދާގެ އެކައުންޓަށް 2.4 މިލިއަން ރުފިޔާ ނަގުދު ފައިސާއިން ޖަމާކުރިކަން ކަށަވަރުވެއްޖެ އެވެ.

މިކަން ފަޅާއެރުމުން "އަދަދު" ނޫހުން ސައުދާއަށް ގުޅުމުން އޭނާ ވަނީ އެ ފައިސާ އޭނާގެ ކައުންޓަށް ޖަމާވި ކަމަށް އިއުތިރާފުވެފަ އެވެ.

އަދަދު ނޫހުން ސުވާލުކުރުމުން ސައުދާ ވިދާޅުވީ އެއީ ވިޔަފާރިވެރިއެއްގެ އަތުން އޭނާ ނެންގެވި ސްޓޫޑަންޓް ލޯނެއް ކަމަށެވެ. އަދި ކަމާގުޅޭ ހުރިހާ ލިޔުންތަކެއް ބޭންކަށް ފޮނުވާފައިވާނެ ކަމަށް ވެސް އޭނާ ވިދާޅުވި އެވެ.

އެ ފައިސާ ސައުދާގެ އެކައުންޓަށް ޖަމާވިކަން ފާހަގަވެގެން އެމްއެމްއޭގެ ފައިނޭންޝަލް އިންޓެލިޖެންސް ޔުނިޓުން ވެސް އެ މައްސަލަ ބަލަމުން އަންނަކަން "ހުރިހާ"އަށް ވަނީ އެނގިފަ އެވެ.

އެ ފައިސާ ދިނީ ކޮން ވިޔަފާރިވެރިއެއްކަން ހާމަކުރަން ސައުދާ ވަނީ ދެކޮޅު ހައްދަވާފަ އެވެ. އަދި 2.4 މިލިއަން ރުފިޔާ ނަގުދު ފައިސާއިން ހަވާލުކުރީ ކީއްވެތޯ ސުވާލުކުރުމުން ވެސް ސައުދާ ޖަވާބެއް ނުދެއްވި އެވެ. އެހެންކަމުން މިކަމުގައި ސުވާލު އުފެދޭ ކަންތައްތަކެއް ހުރިކަމަށް ފާހަގަކުރެވެ އެވެ.

ސައުދާ މަޖިލީހަށް ހުށަހެޅި މާލީ ބަޔާނުން އެނގޭ ގޮތުގައި އަހަރެއްގެ ތެރޭގައި 990،000 ރުފިޔާ އޭނާއަށް މުސާރައިގެ ގޮތުގައި ވަނީ ލިބިފަ އެވެ. އެކަމަކު މާލީ ބަޔާން ހުށަހެޅިއިރު އެކައުންޓުގައި ހުރީ އެންމެ 78،000 ރުފިޔާ އެވެ.

ސައުދާ އަކީ ރައީސް މުހައްމަދު މުއިއްޒުގެ އެއްބަނޑު ކޮއްކޯފުޅެވެ.