ލޯކަލް ގަވަމެންޓް އޮތޯރިޓީ(އެލްޖީއޭ)ގެ ބޯޑަށް ރަށު ކައުންސިލްގެ ރައީސުންގެ ތެރެއިން ކ. ގުރައިދޫ ކައުންސިލްގެ ރައީސް ހުސައިން ޔާމީން މުހައްމަދު އިންތިހާބު ވެއްޖެ އެވެ.

ރަށު ކައުންސިލް ރައީސުންގެ ތެރެއިން އެލްޖީއޭ ބޯޑްގައި ހިމެނޭ މެމްބަރުކަމަށް ޔާމީން އިންތިޚާބުވީ ރަށު ކައުންސިލްތަކުގެ މެމްބަރުންގެ 416 ވޯޓް ހޯއްދަވައިގެންނެވެ. ޔާމީނާ ވާދަ ކުރެއްވި ތޮއްޑޫ ކައުންސިލްގެ ރައީސް އެމްޑީޕީގެ އަހުމަދު ކަރަމްއަށް ލިބިވަޑައިގަތީ 414 ވޯޓެވެ.

މާލެ ސިޓީގެ މޭޔަރު ޑރ. މުހައްމަދު މުއިއްޒު އާ ވާދަ ކޮށްގެން ރަފީއު އިންތިހާބުވީ ސިޓީ ކައުންސިލް މެމްބަރުންގެ 24 ވޯޓް ހޯދަވައިގެންނެވެ. މުއިއްޒަށް ލިބިފައިވަނީ 21 ވޯޓެވެ.

އިލެކްޝަން ކޮމިޝަނުން ހާމަކޮށްފައިވާ ގޮތުގައި، އަތޮޅު ރައީސްގެ ގޮނޑިއަށް އިންތިހާބަކާ ނުލައި، ޕީޕީއެމްއަށް ނިސްބަތްވާ ކ. އަތޮޅުގެ ރައީސް އަހުމަދު ނިމާލު ވަނީ ހޮވިވަޑައިގެންފަ އެވެ. އެއީ، އެ ގޮނޑިއަށް އެމްޑީޕީގެ ފަރާތުން ވާދަކުރައްވާ ނ. އަތޮޅުގެ ރައީސް މުހައްމަދު ބަޝީރު، ވަގުތު ހަމަވިފަހުން ފޯމް ހުށަހަޅުއްވާފައިވާ ކަމަށް ބުނެ އެ ފޯމް ބަލައިނުގަތުމުންނެވެ.

ނަމަވެސް، ބަޝީރު ވަނީ ގަޑި ޖެހުމުގެ ކުރިން އޭނާ ފޯމް މެއިލް ކުރެއްވި ކަމަށް ވިދާޅުވެ، އިލެކްޝަން ކޮމިޝަންގެ ނިންމުން ހައިކޯޓުގައި އިސްތިއުނާފު ކުރުމަށް ނިންމަވައިފަ އެވެ.

ލޯކަލް ކައުންސިލްގެ ގާނޫނަށް ގެނެސްފައިވާ އިސްލާހާ ގުޅިގެން އެލްޖީއޭގެ ބޯޑުގައި ސިޓީ ކައުންސިލަރުންގެ ތެރެއިން މެންބަރަކާއި ރަށު ކައުންސިލަރުންގެ ތެރެއިން މެންބަރެއް އަދި އަތޮޅު ރައީސުންގެ ތެރެއިން މެންބަރެއް ހުންނަވަން ޖެހެ އެވެ.

ފަސް އަހަރަށް ހޮވާ އެލްޖީއޭގެ ބޯޑުގެ މިދައުރުގެ ރައީސް ކަމަށް ރައީސް އިބްރާހީމް މުހައްމަދު ސޯލިހް ވަނީ ހޯމް މިނިސްޓަރު އިމްރާން އަބްދުﷲ އަދި އެތަނުގެ ސީއީއޯގެ މަގާމަށް ފާތިމަތު އަފްޝަން ލަތީފް އައްޔަންކުރައްވާފަ އެވެ.