ހެކި ދައްކައިފިއްޔާ ދޮގުކަން ސާބިތުކުރަން ހަތް ހުވާ ކުރަން ތައްޔާރު: އަލީ ޒާހިރު

ޝަރުއީ ނިޒާމުގެ ތެރެއަށް ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަލީ ޒާހިރު ނުފޫޒު ފޯރުވާ ކަމަށާއި ރައީސް އަބްދުﷲ ޔާމީންގެ ޝަރީއަތަށް ނުފޫޒު ފޯރުވާކަމަށް ބުނެ ދެކެވޭ ވާހަކަތަކާގުޅިގެން އެފަދަ ހެތްކެއް ދައްކައިފިނަމަ ހަތް ހުވާ ކުރަން ތައްޔާރު ކަމަށް އަލީ ޒާހިރު ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އަލީ ޒާހިރު ވިދާޅުވީ އެ މަނިކުފާނާ ގުޅޭ ގޮތުން ދައްކަމުންދަނީ އެއްވެސް އަސްލެއް ނެތް ވާހަކަތަކެއް ކަމަށެވެ.

"އަދި ހެކި ނުދައްކާ. ހެކި ދެއްކީމަ އަޅުގަނޑު ހަތް ފަހަރު ހުވާ ކުރާނަން،" އަލީ ޒާހިރު ވިދާޅުވި އެވެ.

އެކަން ކުރަންވާނީ ކަނޑައެޅިފައި އޮންނަ އުސޫލުގެ ތެރެއިން ކަމަށް ވެސް އޭނާ ވިދާޅުވި އެވެ. އަދި އަސްލު އޯޑިއޯއެއް ލީކުވެއްޖިއްޔާ ވަގުތުން އިސްތިއުފާދޭނެ ކަމަށް ވެސް އަލީ ޒާހިރު ވިދާޅުވި އެވެ.

އޭނާ ތަކުރާރުކޮށް ވިދާޅުވީ އޭނާގެ މައްޗަށް ތުހުމަތު ކުރާ ފަރާތްތަކުން ކުރާ ތުހުމަތުތަކަކީ ފިނޑިކަމުން ކުރާ ތުހުމަތުތަކެއް ކަމަށެވެ.

"އަޅުގަނޑާ ބެހޭގޮތުން އެފަދަ ވާހަކަތަކެއް ދައްކަނީ ކީއްވެ ކަމެއް އަޅުގަނޑަކަށް ނޭނގޭ. އަޅުގަނޑު ނޯންނާނެ އެފަދަ ކަމެއްކޮށްފައި. ކީއްވެގެންތޯ ހަމަ އަޅުގަނޑުގެ ނަން؟ އެއީ ހަމަ އެހެން ބޭފުޅުންގެ ނަން ވިދާޅުވާން ނުކެރޭތީ އެމީހުން ފިނޑިކަމުން،" އަލީ ޒާހިރު ވިދާޅުވި އެވެ.

ރައީސުލްޖުމްހޫރިއްޔާއަށާއި އޭނާއަށް ނިސްބަތްކޮށް ކޯޓުތަކަށް ނުފޫޒު ފޯރުވާކަމަށް ދެކެވޭ ވާހަކަތަކަކީ ވަރަށް ރޭވުންތެރިކަމާއެކު ބަޔަކު ކުރަމުންދާ ކަމެއް ކަމަށާއި އެގޮތުން މިހާރު ޝަރީއަތުގައި ހިނގަމުންދާ މައްސަލައަކަށް ނުފޫޒު ފޯރުވުމަށް ކުރާ ކަމެއް ކަމަށް އޭނާ ވިދާޅުވި އެވެ. އެގޮތުން ރައީސް ޔާމީންގެ ޝަރީޢަތުގެ އަޑުއެހުމެއް މި ސެޕްޓެމްބަރު މަހުގެ ތެރޭގައި ޝެޑިއުލް ކުރެވިފައިވުމަކީ އިއްތިފާގެއް ނޫން ކަމަށް ވެސް އަލީ ޒާހިރު ވިދާޅުވި އެވެ.

ރައީސް އޮފީހާއި ސަރުކާރުގެ ތެރޭގައި ވެސް ވަރަށް ނުފޫޒުގަދަ ބޭފުޅުން ވެސް އެބަތިބި ކަމަށާއި މިފަދަ ތުހުމަތުތައް ވަރަށް ކުރިއްސުރެ ވެސް ކުރެވެމުން އެބަދާ ކަމަށާއި ސީދާ އޭނާއަށް މިފަދަ ތުހުމަތު ކުރެވެނީ ނޫސްވެރިން ސުވާލުކުރުމުން ތަކުރާރު ކޮށް އަލީ ޒާހިރު ވިދާޅުވީ "އެބޭފުޅުން ފިނޑިކަމުން" ކަމަށެވެ.

އޭނާ އިތުރަށް ވިދާޅުވީ އޭނާ ޗީޕް އޮފް ސްޓާފްގެ މަގާމުގައި ހުންނަވަނީ ކޯލިޝަންގެ ތެރެއިން ކަނޑައެޅިފައިވާ ސްލޮޓްގެ ތެރެއިން ނޫން ކަމަށާއި، އަދި އެއީ އަދާލަތު ޕާޓީގެ މަގާމެއް ވެސް ނޫން ކަމަށެވެ.

އަލީ ޒާހިރާއި ގުޅިގެން ދެކެވޭ ވާހަތައް އޭނާ ދޮގުކޮށްފައިވާއިރު، ކޯޓުތަކަށް އަލީ ޒާހިރުގެ ނުފޫޒު ފޯރުވާކަމަށް ކްރިމިނަލް ކޯޓުގެ ކުރީގެ ފަނޑިޔާރުން ބޭއްވި ނޫސްވެރިންގެ ބައްދަލުވުމެއްގައި އެ ބައިވެރިވި ފަނޑިޔާރުން ވަނީ ހާމަކޮށްފަ އެވެ. އެގޮތުން ކުރީގެ ފަނޑިޔާރު ހަސަން ނަޖީބު ވިދާޅުވީ ރައީސް ޔާމީންގެ މައްސަލަ ބެއްލެވި ހައިލަމަށް ގުޅުއްވައި އަލީ ޒާހިރު ނުފޫޒު ފޯރުވި ކަމަށެވެ. އަދި ރައީސް ޔާމީންގެ މައްޗަށް ހުކުމްކުރި ބެންޗުގައި ހިމެނިވަޑައިގެންނެވި ފަނޑިޔާރުންގެ ތެރެއިން އަލީ އާދަމް ކަމަށް ތުހުމަތުވާ ބޭފުޅަކު އޭނާއަށް ގުޅުއްވައި ރައީސް ޔާމީނުގެ މައްސަލާގައި ބެންޗުގައި އިންނެވުމަށާއި، ހުރިހާ ކަމެއް ކުރައްވާނީ އަލީ ރަޝީދު ކަމަށް ވިދާޅުވެ އަލީ ޒާހިރު އޭނާއަށް އިރުޝާދު ދެއްވި ކަމަށް ވިދާޅުވާ އޯޑިއޯއެއް ވެސް ވަނީ ލީކުވެފަ އެވެ.