ސަރުކާރުގެ ސިޔާސަތަށް ގެނައި ބަދަލަކާއި ގުޅިގެން ޖެންޑާ މިނިސްޓްރީން ވަކިކުރި 21 މުވައްޒަފުން އެހެން އޮފީސްތަކަށް ބަދަލުކުރުމަކީ އެންމެ އިންސާފުވެރިގޮތް ކަމަށް މާލެގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.

މޭޔަރު މުއިއްޒު މިހެން ވިދާޅުވީ ޖެންޑާ މިނިސްޓްރީއިން ވަކިކުރި 21 މުވައްޒަފުންނާއެކު ބޭއްވި ބައްދަލު ކުރެއްވުމަށްފަހު ކުރެއްވި ޓުވީޓެއްގައި އެވެ.

މުއިއްޒު އިތުރަށް ވިދާޅުވީ ސިޔާސަތަށް އައި ބަދަލެއްގެ ސަބަބުން ވިލިމާލޭގައި މަސައްކަތްކުރާ ޖެންޑާ މިނިސްޓްރީގެ 21 މުވައްޒަފުން ވަކިކޮށްފައިވަނީ ވަރަށް ހިތާމަހުރި ކަމެއް ކަމަށެވެ. އަދި އެ މުވައްޒަފުން މަގުމަތިވިޔަ ނުދީ އެހެން އޮފީސްތަކަށް ބަދަލުކޮށްދިނުމަކީ އެންމެ އިންސާފުވެރިކޮށްކަމަށް ދެކެވަޑައިގަންނަވާ ކަމަށް ވެސް މޭޔަރު ވިދާޅުވި އެވެ.

ޖެންޑާ މިނިސްޓީން މިއަދު ވަކިކުރި 21 މުވައްޒިފުންނަކީ ވިލިމާލޭ ކުޑަކުދިންގެ ހިޔާގައި މަސައްކަތް ކުރަމުންދާ މުވައްޒިފުންނެވެ. ހިޔާގައި ތިބި ކުދިން ހުސްކުރުމަށްފަހު އެތަނުގައި މަސައްކަތް ކުރި 71 މުވައްޒަފުންނަށް މިދިޔަ ޑިސެމްބަރު މަހުގައި ނޯޓިސް ދީފައިވާ ކަމަށް މައުލޫމާތު ލިބެ އެވެ.

ކުޑަކުދިންގެ ހިޔާ ބަންދުކޮށް އެތަނުގައި ތިބި ކުދިން އެކި ރަށްރަށުގައި ހިންގަމުންދާ އަމާންވެށިތަކަށް ބަދަލުކުރަން މިނިސްޓްރީގެ ބެލުމުގެ ދަށުން ހިންގާ އެހެނިހެން ތަންތަނަށް ވަޒީފާ ބަދަލުކުރަން ބޭނުންވާ މުވައްޒަފުންނަށް އެ ފުރުސަތު މީގެ ކުރިން ހުޅުވާލި އެވެ.

ހިޔާގައި ތިބި 43 މުވައްޒަފަކު ވަނީ އެހެން ތަންތަނަށް ބަދަލުކޮށްފަ އެވެ. އަދި 8 މުވައްޒަފަކު ވަނީ އަމިއްލައިން ވަޒީފާއިން ވަކިވެފަ އެވެ.