ޕާކިސްތާނުގެ މީޑިއާތަކުގައި އިދިކޮޅު ލީޑަރު އިމްރާން ޚާނުގެ ނަން ކިޔުމާއި ފޮޓޯ ދެއްކުން ފަދަ ކަންތައް އެގައުމުގެ މީޑިއާ ރެގިއުލޭޓު ކުރާ ފަރާތްތަކުން މަނާ ކޮށްފި އެވެ.

މިދިޔަ އަހަރުގެ އެޕްރީލް މަހު ޕާކިސްތާނުގެ ބޮޑު ވަޒީރުކަމުން އިމްރާން ޚާން ދުރުކުރެވުނު ފަހުން އެގައުމުގެ މީޑިއާތަކުން ޚާންގެ ވާހަކަތައް އައީ ފަލަ ސުރުޚީތަކެއް ހޯދަމުންނެވެ. ސަރުކާރާއި އަސްކަރިއްޔާ އާ ދެކޮޅަށް ދެއްވާ ސްޕީޗްތަކާއި ޓްވީޓްތަކަކީ މީޑިއާތަކުގެ އެންމެ ހޫނު ޚަބަރުތައް ކަމަށް އޮތީ ވެފަ އެވެ.

ޕާކިސްތާން އިލެކްޓްރޯނިކް މީޑިއާ ރެގިއުލޭޓަރީ އޮތޯރިޓީ (ޕެމްރާ) އިން މިދިޔަ މާޗް މަހު ވަނީ އިމްރާން ޚާންގެ ތަގުރީރުތަކާއި ނޫސް ކޮންފަރެންސް ފަދަ އެއްޗެތި ދެއްކުން މަނާ ކޮށްފަ އެވެ. ސަބަބެއް ކަމަށް ބުނެފައި ވަނީ އެ ތަގުރީރުތަކުގައި މީސްތަކުންގެ މެދުގައި ރުޅިވެރިކަން އުފައްދައި ސަރުކާރުގެ މުއައްސަސާތަކާ މެދު ނަފުރަތު އުފެދޭ ގޮތަށް ބަސްމަގު ހުރުމެވެ.

މިދިޔަ މޭ މަހު އިމްރާން ޚާންގެ އިސްތަށިފުޅުގައި ކޮރަޕްޝަންގެ ތުހުމަތުތައް އަޅުވައި، ހައްޔަރު ކުރުމަށް ފަހު ޕެމްރާ އިން ވަނީ ވަކި މީހެއްގެ ނަން ނުގަނެ ގައުމުގައި ރުޅި ވެރިކަން އުފެދޭ ފަދަ ވާހަކަ ދައްކާ ފަރާތްތަކަށް މީޑިއާތަކުން ފުރުސަތު ނުދޭން އަންގައިފަ އެވެ. އެ ބަޔާނުގައި ވަކި މީހެއްގެ ނަން ނެތަސް ނޫސްވެރިން ދެކޭ ގޮތުގައި އެއީ އިމްރާން ޚާން ފިޔަވައި ދެވަން މީހެއްގެ ވާހަކައެއް ނޫނެވެ.

"ހެއްވާ ކަމަކީ ޚާންގެ މައްޗަށް އުފުލިފައިވާ ދައުވާގެ ވާހަކަ ނޫސްތަކުގައި ލިޔަން ޖެހޭ. އެކަމަކު އޭނާގެ ނަން ޖެހުމާއި ފޮޓޯ ޖެހުން އެއީ މަނާ ކަންތައް،" ސީނިއާ ރިޕޯޓަރެއް ކަމުގައިވާ އަސްމާ ޝިރާޒީ ބުންޏެވެ. "މީޑިއާގެ މައްޗަށް ބާރު ފޯރުވުމަށްޓަކައި ވަނީ ތަފާތު އެތައް އުކުޅެއް ބޭނުން ކޮށްފައި."

މައުލމާތު އެނގޭ ބައެއް ފަރާތްތަކުން ބުނެފައިވާ ގޮތުގައި ލޯކަލް މީޑިއާތަކުގެ ވެރިންނާ އެކު ސިފައިންގެ އިސް އޮފިސަރުންތަކެއް ވަނީ ބައްދަލުވުމެއް ބާއްވައިފަ އެވެ. އެ ބައްދަލުވުމުގައި މީޑިއާތަކުގެ ވެރިންނަށް ވަނީ އިމްރާން ޚާނަށް މީޑިއާތަކުން އެއްވެސް ބާވަތެއްގެ ކަވަރޭޖެއް ނުދިނުމަށް އިންޒާރު ކޮށްފަ އެވެ.

އަންނަ އޮކޮޓޯބަރު މަހުގެ މެދު ތެރޭގައި ޕާކިސްތާނުގެ އާންމު އިންތިޚާބު ބާއްވަން ޖެހިފައިވާއިރު، އިދިކޮޅު ލީޑަރު އިމްރާން ޚާންގެ މައްޗަށް 150 އަށް ވުރެ ގިނަ ދައުވާ ވަނީ އުފުލާފަ އެވެ. ޚިޔާލު ހޯދުމުގެ ވޯޓުތަކުން ދައްކާ ގޮތުން އިންތިޚާބުގައި އިމްރާން ޚާނަށް ބޮޑު ކާމިޔާބީއެއް ލިބި ވަޑައިގަންނަވާނެ އެވެ.