ބޭންކު އޮފް މޯލްޑިވްސް (ބީއެމްއެލް) އަށް ޑޮލަރު ލިބުން ދަތިވެ، ރުފިޔާ ކާޑުތަކުން ޑޮލަރު މުއާމަލާތްތައް މިއަދުން ފެށިގެން އެއްކޮށް ކަނޑާލިއިރު، ރާއްޖެއިން ބޭރުގައި ކިޔަވާ ކުދިންނަށް ދެމުން އައި ލިމިޓް ވެސް ކަނޑާލައިފި އެވެ.

ސަރުކާރު ހިއްސާވާ އެންމެ ބޮޑު ބޭންކުގެ އޮފިޝަލަކު މިއަދު ވިދާޅުވީ އެ ބޭންކުން މިއަދު ނިންމި ނިންމުގައި ރާއްޖެއިން ބޭރުގައި ދިރިއުޅޭ މީހުންނަށާއި ކިޔަވާ ކުދިންނަށް ދެމުން އައި ލިމިޓް ވެސް އުވާލައި، ޑެބިޓް ކާޑުތަކުން ޑޮލަރުގެ މުއާމަލާތް ނުކުރެވޭނެ ކަމަށެވެ. ނަމަވެސް ޔުނިވާސިޓީތަކަށް ދައްކާ ފީ އާއި ސްޓައިޕެންޑް ކުރިއެކޭ އެއްގޮތަށް އަދިވެސް ލިބޭނެ ކަމަށް އޭނާ ވިދާޅުވި އެވެ.

ރާއްޖޭން ބޭރުގައި ކިޔަވާ ކުދިންނަށް ކޮންމެ މަހެއްގެ މައްޗަށް ނެގޭ ޑޮލަރުގެ އަދަދު މަތި ކުރުމަށް މިދިޔަ ޑިސެމްބަރު 25 ވަނަ ދުވަހު ބޭއްވި ކެބިނެޓު ބައްދަލުވުމުގައި ނިންމާފައިވެ އެވެ. އަދި އެ ނިންމުން ފެބްރުއަރީ 1ގައި ތަންފީޒު ކުރާނެ ކަމަށް ބުނެ ފޮނި ހުވަފެން ދެއްކި އެވެ. އެގޮތުން 750 ޑޮލަރުގެ ލިމިޓް 1،200 ޑޮލަރަށް ބޮޑުކުރާނެ ކަން އިއުލާންކުރި އެވެ.

ރައީސް އޮފީހުގެ ޕްރިންސިޕަލް ސެކްރެޓަރީ އޮން ޕަބްލިކް ޕޮލިސީ އަބްދުالله ނާޒިމް ވިދާޅުވީ އެކަމާ ގުޅޭގޮތުން ނިންމަވަން ޖެހޭ އިދާރީ ޓެކްނިކަލް މަސައްކަތްތަކެއް, ހާއްސަކޮށް ފިނޭންސް މިނިސްޓްރީ އާއި ބޭންކް އޮފް މޯލްޑިވްސް އެމްއެމްއޭއާ ގުޅިގެން ކުރިއަށްގެންދިޔުމަށް ކެބިނެޓުން ވަނީ ނިންމަވާފައިވާ ކަމަށެވެ.

އޭގެ އިތުރުން މިދިޔަ ޖުލައި މަހު ސަރުކާރުން ނިންމީ ޑޮލަރު ލިމިޓް ބޮޑުކުރުމުގެ ބަދަލުގައި ރާއްޖެ އިން ބޭރުގައި ކިޔަވަން ތިބޭ ދިވެހި ދަރިވަރުންނަށް މީގެ ކުރިން 1،000 ޑޮލަރާ ހަމައަށް ޑޮލަރު ގަނެވޭ ގޮތަށް ބޭންކް އޮފް މޯލްޑިވްސް (ބީއެމްއެލް) އިން ހަމަޖައްސާފައިވާ އުސޫލު ވެސް ބަދަލުކޮށް އެ ދަރިވަރަކު ހުންނަ ގައުމަކަށް ހަޔާ އެޑިއުކޭޝަން މިނިސްޓްރީން ދޭން ކަނޑައަޅާފައިވާ ސްޓައިޕެންޑް ރޭޓާ އެއްމިންވަރަށް ފައިސާ ފޮނުވައިދޭ ގޮތަށެވެ.