އިޒްރޭލް ޕާސްޕޯޓް މަނާ ކުރުމުގެ މައްސަލަ މަޖިލީހުގައި ފެށީ ރައީސް މުހައްމަދު މުއިއްޒު ފަލަސްތީނު މައްސަލައިގައި ވަކާލާތު ކުރެއްވުމަށް ސައުދީއަށް ވަޑައިގަންނަވަން ޖެހުމުންކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

ޔާމީން މިހެން ވިދާޅުވީ އެ މަނިކުފާނުގެ ޕާޓީ ޕީއެންއެފް އިން ރޭ ބޭއްވި ހަރުގެ ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން މިފަދައިން ވިދާޅުވި އިރު، އިޒްރޭލް ޕާސްޕޯޓު މަނާ ކުރުމުގެ ބިލު ވަނީ ރައްޔިތުންގެ ސަލާމަތީ ހިދުމަތްތަކާބެހޭ (241) ކޮމިޓީގައި އެޖެންޑާކޮށްފަ އެވެ. މިއަދުގެ މަޖިލިސް ޖަލްސާގައި އެކަން އަވަސް ކުރަން ގޮވާލާ އިދިކޮޅުން ގަރާރެއް ހުށަހެޅުމަށް ވެސް ވަނީ އެޖެންޑާކޮށްފަ އެވެ.

މީގެ އިތުރުން ރައީސް މުހައްމަދު މުއިއްޒު މިވަގުތު ހުންނެވީ ފަލަސްތީނު މައްސަލައިގައި އިސްލާމީ ގައުމުތަކުގެ ވެރިންގެ ކުއްލި ބައްދަލުވުމުގައި ބައިވެރިވެވަޑައިގެންނެވުމަށް ސައުދީގެ ރިޔާދުގަ އެވެ.

"މިހާރު ކުއްލިއަކަށް މިބުނީ އެ މައްސަލަ ކޮމިޓީގައޭ. މާތްކަލަކޯ މިއީ ކޮމިޓީއަށް ދާން ޖެހޭވަރުގެ ކަމެއް ނޫނޭ. މިހާރު ފަލަސްތީނު މައްސަލާގައި ވާހަކަދައްކަން ޖެހޭތީ މޫނު އޮމާންކޮށްލާފައި، މަތި އޮމާންކޮށްލާފައި، ރީތި ކޮށްލާފަ ބުނީމަ މައްސަލަ ކޮމިޓީއަށް ދިޔައީ،" ރައީސް ޔާމީން ވިދާޅުވި އެވެ.

މިގޮތަށް ކަންތައްކުރެއްވުމުން ކޮމިޓީގައި މިހާރު އެ މައްސަލަ އޮތުމުން އެ މަސައްކަތް ވަރަށް ބާރަށް ހިނގާ ވާހަކަ ސަރުކާރަށް ބުނެވެން އޮންނާނެ ކަމަށް ޔާމީން ވިދާޅުވި އެވެ.

އިޒްރޭލް ޕާސްޕޯޓް މަނާކުރުމަށް ބިލް މަޖިލީހަށް ހުށަހަޅާފައި އޮންނަތާ ފަސް މަސް ފަހުން މަޖިލީހުން ބިލުގެ މަސައްކަތް ފެށިއިރު، އިޒްރޭލު ޕާސްޕޯޓް މަނާކުރުމަށް އިމިގްރޭޝަން ގާނޫނަށް އިސްލާހު ގެނައުމުގެ ބިލު މަޖިލީހަށް ހުށަހެޅުއްވީ އެމްޑީޕީގެ ގަލޮޅު އުތުރު ދާއިރާގެ މަޖިލިސް މެމްބަރު މީކާއީލް އަހުމަދު ނަސީމެވެ. ބިލު ހުށަހެޅުއްވީ މިދިޔަ މެއި 29 ވަނަ ދުވަހު އެވެ. އެ ބިލް ބަލައިގަނެ ސަލާމަތީ ހިދުމަތްތަކާ ބެހޭ ކޮމިޓީއަށް ފޮނުވީ މިދިޔަ ޖޫން މަހުގެ 10 ވަނަ ދުވަހު އެވެ.

ކޮމިޓީން ބިލުގެ މަސައްކަތް ކުރިއަށް ނުގެންގޮސް ގިނަ ދުވަސްތަކެއް ވަމުންދާތީ އިދިކޮޅުން އެކި ފަހަރުމަތިން ހުށަހެޅި ކުއްލި މައްސަލަތައް ވެސް ޕީއެންސީގެ ސުޕަ މެޖޯރިޓީ އޮންނަ މަޖިލީހުން ވަނީ ބޭރުކޮށްލާފަ އެވެ.

އެމްޑީޕީން އެ ބިލް މަޖިލީހަށް ހުށަހަޅާފައިވަނިކޮށް، އިޒްރޭލް މީހުން ރާއްޖެ އެތެރެވިޔަ ނުދިނުމަށް ގާނޫނަށް ގެންނަން ޖެހޭ އިސްލާހުތައް ގެންނަން މަޖިލީހަށް ހުށަހަޅަން ކެބިނެޓްގެ ބައްދަލުވުމުގައި ރައީސް މުހައްމަދު މުއިއްޒު ވަނީ ނިންމަވާފަ އެވެ. އެގޮތަށް ކެބިނެޓުން ނިންމިއިރު ރައީސްގެ ރިޔާސީ ގަރާރަކުން އެކަން ކުރެވޭނެ ކަމަށް ގިނަ ބަޔަކު ދަނީ ބުނަމުނެނެވެ. އެހެންކަމުން މިހާރުވެސް ސަރުކާރުން މިކަން ކުރުމުގައި އިހުލާސްތެރިކަމެއް ނެތްކަމަށް ބައެއް ފަރާތްތަކުން ތުހުމަތުކުރެ އެވެ.