ދިވެހި ސަރުކާރަށް ޑޮލަރުގެ ދަތިކަން އިންތިހާ އަށް ކުރިމަތިވީ އެވެ. ރިޒާވް ގާތްގަނޑަކަށް ހުސްވީ އެވެ. ބޭރުގެ ދަރަނި ދެއްކޭނެ ގޮތް ހުސްވީ އެވެ. ބޭނުންވާ އަސާސީ ބާވަތްތައް އެތެރެ ކުރެވޭނެ މަގު ބަންދުވީ އެވެ. އެފަދަ ނާޒުކު ވަގުތުގައި ރައީސް މުހައްމަދު މުއިއްޒު ފުރިހަމަ ނިންމުމެއް ނިންމެވީ އެވެ. ޓޫރިޒަމް ސެކްޓާ އަށް އެތެރެވާ ގިނަ އަދަދެއްގެ ޑޮލަރު އެމެއެމްއޭ އަށް މާރުކުރަން މަޖުބޫރު ވާ ގަވައިދެއް ހެއްދެވީ އެވެ. ރާއްޖޭގެ ތާރީޚުގައި އެއްވެސް ވެރިޔަކަށް ކުރަން ނުކެރުރުނު ބޮޑު ކަމެއް އެއްފަހަރާ ކުރައްވައި ޑޮލަރުގެ މައްސަލަ ވަގުތުން ހައްލު ކޮށްލެއްވީ އެވެ. ރައީސް މުއިއްޒުގެ ދުރުވިސްނުމާއި ކުޅަދާނަ ކަމަށް ޝުކުރު އަދާކޮށް ޕޯސްޓަރުތައް އޮހިގަތީ އެވެ. އެމަނިކުފާނު ހުންނެވި ކަމަށް ވަނީ ރައްޔިތުންގެ ފަޅީގަ އެވެ. ސުވާލަކީ ރައްޔިތުން ތިބީ ކޮންފަޅިއެއްގައި ހެއްޔެވެ؟

ދުވަސްކޮޅެއް ކުރިން ރައްޓެއްސަކާ ފޯނުން ވާހަކަދައްކާލުމުގެ ފުރުސަތު ލިބުނެވެ. އެއީ މާލޭގައި ރަނގަޅު ފެންވަރުގެ ވިޔަފާރިއެއް ކުރާ މީހެކެވެ. އޭނާގެ ވާހަކަ ހުރީ ކުރިން ވާހަކަ ދައްކާ ރާގަކަށް ނޫނެވެ. ބުންޏެވެ. މިހާރު ދެން މިކަން ކުރެވޭކަށް ނެތެވެ. ވިޔަފާރީގައި މިވީހާ ތަނަށް ބޭރުން ގެންނަ ޝިޕްމެންޓަށް އޯޑަރު ކުރުމަށްފަހު ފައިސާ ނުދެއްކި ތާށިވެފައެއް ނޯންނާނެ ކަމަށް ބުނުމަށްފަހު އޭނާ ބުނީ އެންމެ ފަހުން ހެއްދި އޯޑަރަށް ވެސް އަދި މިއުޅެނީ ފައިސާ ނުދެއްކިގެން ކަމަށެވެ.

އެ މައްސަލަ ގުޅެނީ ޑޮލަރުގެ ތާށިކަމާ އެވެ. ބޭރުން ގެންނަ މުދަލަށް ފައިސާ ދައްކަން ޖެހެނީ ޑޮލަރުން ކަމަށްވެފައި އެކަމަށް ބޭނުންވާ ޑޮލަރު ނުލިބޭ ކަމަށްވާނަމަ އެފައިސާ ދައްކާނީ ކިހިނެއްހޭ އޭނާ ސުވާލު ކުރި އެވެ. އަހަރެންގެ ސުވާލަކަށްވީ ޑޮލަރު ނުލިބެނީ ކީއްވެގެން ހެއްޔެވެ. އޭނާ ދިން ޖަވާބު ދިގުވެފައި ތަފުސީލެވެ.

މިވީހާތަނަށް ދުވަހަކު ވެސް މައްސަލައެއް ނެތި ސަޕްލަޔަރުންނަށް ފައިސާ ދައްކަމުން އައީ ރާއްޖެއިން ޑޮލަރު ގަނެގެންނެވެ. އެ ވިޔަފާރީގެ ބޮޑު ބަޔަކީ ރިސޯޓުތަކަށް ސަޕްލައި ކުރުން ކަމުން އެ ރިސޯޓުތަކުގެ ޕޭމެންޓުތަކުގެ މިންވަރެއް ވެސް މިހާތަނަށް އައީ ޑޮލަރުން ލިބެމުންނެވެ. އޭގެ އިތުރުން ކަޅު ބާޒާރުން ގަންނަ ޑޮލަރާއެކު އެއްވެސް މައްސަލައެއް ނެތި ޝިޕްމެންޓްތަކަށް ފައިސާ ދައްކަމުން އައި އައުން ނިމުމަކަށް އައީ، ޓޫރިޒަމް އިންޑަސްޓްރީއަށް ވަންނަ ޑޮލަރު ސަރުކާރުގެ މާލީ އިދާރާއަށް މާރުކުރަން މަޖުބޫރު ކުރި ހިސާބުންނެވެ. އެއާ އެކު ދިމާވި ގޮންޖެހުމަކީ ރިސޯޓުތަކުން ޑޮލަރުން ދެމުން ގެންދިޔަ ޕޭމެންޓް ހުއްޓާލުމާއި، އެ ރިސޯޓުތަކުގެ މުވައްޒަފުންނަށް ކުރިން ޑޮލަރުން ދެމުން ގެންދިޔަ މުސާރަ ރުފިޔާއިން ދިނުން ފަދަ ކަންތައްތަކާ ހުރެ ބާޒާރު މަތިން ވެސް ޑޮލަރު ގަންނަން ނުލިބުމެވެ. އެހެންކަމުން އޭނާ ސިފަ ކުރިގޮތުގައި ސަރުކާރުން ޑޮލަރުގެ ސިޔާސަތަށް ގެނައި ބަދަލަކީ އެއްވެސް ތާކުންތާކު ނުޖެހޭ އެންމެނަށް އޭގެ ތަކުލީފު ބޮޑު ސިޔާސަތެކެވެ.

ދެން އޮތީ ޑޮލަރު މާރުކުރަން ސަރުކާރުން މަޖުބޫރުކުރުވި ރިސޯޓު އޯނަރުންގެ ޝަކުވާ އެވެ. ރާއްޖޭގެ ޓޫރިޒަމްގެ އެންމެ ބޮޑު ނަންތައް ކަމަށްވާ ޔުނިވާސަލާއި ޗަމްޕާ ގުރޫޕް ހިމެނޭހެން ފަންސާހަށް ވުރެ ގިނަ ރިސޯޓުން ވަނީ ސަރުކާރުގެ ނިންމުމަކީ ތަންފީޒު ކުރެވޭ ވަރުގެ ނިންމުމެއް ނޫން ކަމަށް އަންގާފަ އެވެ. އެ އެންގުމާ ގުޅިގެން ނުސީދާކޮށް ރިސޯޓު އޯނަރުންނަށް ނިސްބަތް ކުރައްވައި ރައީސް މުއިއްޒު ވިދާޅުވެފައިވަނީ ރައްޔިތުންގެ ފަޅީގައި ތިބީ ކޮން ބައެއްކަން ހާމަވެގެންދާނެ ކަމަށެވެ.

ކުރީގެ ރައީސް އަބްދުﷲ ޔާމީން ވެސް ވަނީ އެމަނިކުފާނު ގަވާއިދުން ބާއްވަމުން ގެންދަވާ ފްރޮންޓް އޮފީސް ޖަލްސާގައި ޑޮލަރުގެ މައްސަލައާ ބެހާގޮތުން ވާހަކަފުޅު ދައްކަވާފަ އެވެ. އެމަނިކުފާނު ވިދާޅުވި އެވެ.

"ރިސޯޓުތަކުން ދައުލަތަށް ދައްކަންވާ ހުރިހާ ފައިސާއެއް އެދައްކަނީ ޑޮލަރުން. ގްރީން ޓެކްސް އަށް ދަންދެން، ޓީޖީއެސްޓީ އަށް ދަންދެން، ދެންވެސް ނަގާ ޓެކްސް އެއް، އެ ދައްކަނީ ޑޮލަރުން،" އެމަނިކުފާނު ވިދާޅުވި އެވެ.

ރައީސް ޔާމީން ވިދާޅުވި ގޮތުގައި ދައުލަތަށް ދައްކަން ޖެހޭ ހުރިހާ ފައިސާއެއް ޑޯލަރުން ދެއްކުމަށް ފަހު އެމީހުންގެ ވިޔަފާރީގެ ފައިދާއިން އެމީހުންގެ އިންވެސްޓްމެންޓްތަކަށް ނެގި ދަރަނި ދައްކަން ޖެހެނީ ވެސް ޑޮލަރުންނެވެ. އެ މީހުން ލޯނު ނަގާފައި ހުންނަނީ ޑޮލަރުންނެވެ. އެހެންކަމުން، ރައީސް ޔާމީން ވިދާޅުވި ގޮތުގައި އެފައިސާ ވަކި ރޭޓެއްގައި އެމްއެމްއޭއަށް މާރުކުރަން އެންގުމަކީ އިންސާފެއް ނޫނެވެ. އެގޮތަށް އަމަލުކުރުމުން ނިކުންނާނެ ނަތީޖާއަށް ވެސް އެމަނިކުފާނު އިޝާރާތް ކުރެއްވި އެވެ. އެމަނިކުފާނު ދެއްކެވި ވާހަކަފުޅުގެ ޚުލާސާއަކީ ރިސޯޓުތަކަށް ދިމާވާ ގޮންޖެހުންތަކުގެ ސަބަބުން ޓޫރިޒަމް ސިނާއަތަށް އަސަރު ކުރުމުގެ ނަތީޖާއަކަށް ވާނީ އެކަމުގެ އަސަރު މުޅި ގައުމަށް ކުރުމެވެ. ރިސޯޓުތަކުގައި ވަޒީފާ އަދާކުރާ އެތައް ސަތޭކަ ޒުވާނުންގެ ވަޒީފާ ގެއްލި، އިތުރު އިންވެސްޓްމެންޓު ކުރުމަށް އޮތް މަގު ބަންދުވުމުން އޭގެ ނުބައި އަސަރު ކުރާނީ މުޅި ގައުމަށެވެ. ދައުލަތަށް ވަންނަ ފައިސާ ވެސް ވާނީ މަދެވެ.

ރައްޔިތުންގެ ފަޅީގައި ހުންނެވި ކަމަށް ވިދާޅުވަމުން، ރައްޔިތުންނަށް ސީދާ އެކަމުގެ އަސަރުކުރާނެ ގިނަ ނިންމެވުންތަކެއް، ރައީސް މުއިއްޒު ވަނީ ދާދި ފަހުން ނިންމަވާފަ އެވެ. އޭގެ ތެރޭގައި އާސަންދައިން ހުރިހާ ރައްޔިތުންނަށް ހޭދަނުކުރާ ގޮތަށް ނިންމެވުމާއި މުސްކުޅިންގެ އެލަވަންސް ވެސް ވަކި ބަޔަކަށް ނޫނީ ނުލިބޭ ގޮތަށް ހަމަޖެއްސެވުމުގެ އިތުރުން ކާޑުގެ ބާވަތްތަކާއި އެނޫން ވެސް އާންމު ޚިދުމަތްތަކަށް ދެމުން ގެންދިޔަ ސަބްސިޑީސް އުވާލުން ހިމެނެ އެވެ.

ޑޮލަރުގެ މައްސަލައާއި ފައިސާ ނެތުމުގެ މައްސަލަތަކާ ހުރެ އާސަންދައިން ރައްޔިތުންނަށް ކުރާ ޚަރަދު މަދުކުރުމާއި ފުލުހުންނާއި ސިފައިންނަށް އޮންނަ އިންޝުއަރެންސް ހުއްޓާލުން ފަދަ ކަންތައް ސަރުކާރުން ކުރަނީ ޚަރަދު ކުޑަކުރުމަށް ކަމުގައި ވިޔަސް ދައުލަތުގެ މުއައްސަސާތަކުގެ ވެރިންނާއި ރައްޔިތުންގެ މަޖިލީހުގެ މެންބަރުންނަށާއި އާއިލާއަށް، އާސިޔާންގެ ގައުމުތަކުން ބޭސްކުރެވޭ ގޮތަށް އޮންނަ ހެލްތު އިންޝުއަރެންސް ސްކީމަށް ބަދަލުގެނައުމުގެ ވާހަކައެއް ވެސް ނުދެކެވެ އެވެ.

އެހެންކަމުން ޑޮލަރުގެ "ބޮޑު ހަނގުރާމަ" އެއް ސަރުކާރާއި ރިސޯޓު އޯނަރުންނާއި ދެމެދު ފެށުމުގެ އިތުރުން ސަރުކާރުން އާންމު ރައްޔިތުންނަށް ދޭ ވެލްފެއާގެ ބޮޑު ބައެއް ކަނޑާލަން ރާވަމުން، ރައީސް މުއިއްޒު ހުންނެވީ ރައްޔިތުންގެ ފަޅީގައޭ ވިދާޅުވާއިރު ރައްޔިތުން ތިބީ ކޮންފަޅިއެއްގައި އެއްގައިތޯ ބަލާލަން އެބަޖެހެ އެވެ.