ކުރީގެ ރައީސް އަބްދުﷲ ޔާމީނާއެކު އަބަދުވެސް އެންމެ މުހިއްމު ވަގުތުގައި އެކުގައި ހުންނެވި ކަމަށް އެ މަނިކުފާނުގެ ސަރުކާރުގެ ފުރަތަމަ ނައިބު ރައީސް ޑރ. މުހައްމަދު ޖަމީލް އަހުމަދު މިއަދު ވިދާޅުވެއްޖެ އެވެ.

ޑރ. ޖަމީލް ވަނީ ރައީސް ޔާމީންގެ ރަނިންމޭޓްގެ ހައިސިއްޔަތުން 2013 ވަނަ އަހަރު ޕީޕީއެމްގެ ކެމްޕޭންގައި ބުރަ މަސައްކަތްތަކެއް ކުރައްވައި ރިޔާސީ އިންތިހާބު ކާމިޔާބުކުރައްވައިފަ އެވެ. އަދި މިފަހަރުގެ ޝަރީއަތުގައި ވެސް ކްރިމިނަލް ކޯޓުން ފެށިގެން ހުރިހާ މަރުހަލާއެއްގައި ވެސް ރައީސް ޔާމީންގެ އިސް ވަކީލެއްގެ ގޮތުގައި ހުންނެވީ ވެސް ޑރ. ޖަމީލެވެ.

https://www.facebook.com/drmohamed.j.ahmed/posts/10158379642422026

ރައީސް ޔާމީންގެ މައްޗަށް ކްރިމިނަލް ކޯޓުން އިއްވާފައިވާ މަނީ ލޯންޑަރިންގެ ކުށް ސާބިތުވެ ފަސް އަހަރަށް ޖަލަށް ލުމަށް ކޮށްފައިވާ ހުކުމް ސުޕްރީމް ކޯޓުގެ ފަނޑިޔާރުންގެ ބެންޗުގެ އިއްތިފާގުން މިއަދު ބާތިލުކުރެއްވުމާ ގުޅިގެން ފޭސްބުކް ސްޓޭޓަސްއެއްގައި ޑރ. ޖަމީލް ވިދާޅުވީ "އަބަދުވެސް އެންމެ މުހިއްމުވަގުތުގައި އެކުގައި، ޚިދުމަތުގައި. ރައީސް ޔާމީނަކީ ހަމައެކަނި ގާތް ރަޙްމަތްތެރިއެއް ނޫން. މުރުޝިދެއް، ގައުމީ ބަޠަލެއް،" ކަމަށެވެ.

2013 ވަނަ އަހަރުގެ ކެމްޕޭންގެ ބައެއް ފޮޓޯތަކާއެކު، ޑރ. ޖަމީލް ވިދާޅުވެފައި ވަނީ އެމަނިކުފާނުގެ ލީޑާޝިޕް ގައުމަށް މިންވަރު ކުރެއްވުމަށް އެދި ދުއާކުރައްވައިފަ އެވެ. އަދި މުޅި ލީގަލް ޓީމަށް މަރުޙަބާ ވެސް އެމަނިކުފާނު ވިދާޅުވި އެވެ.