ޕީޕީއެމް އޮތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ އެކު ކަމަށާއި ރައީސް މުއިއްޒުގެ ސަރުކާރުގެ ހިމާޔަތުގައި ކަމަށް ޑިފެންސް މިނިސްޓަރު ގައްސާން މައުމޫން ވިދާޅުވެއްޖެ އެވެ.

ޕީޕީއެމް/ޕީއެންސީ ކޯލިޝަންގެ ބޭފުޅުންގެ ތެރޭގައި ހިޔާލުތަފަތުވުން އުފެދި ޕީޕީއެމްގެ ރައީސް އަބްދުﷲ ޔާމީން އެ ޕާޓީން ވަކިވެވަޑައިގެން އެހެން ޕާޓީއެއް އުފައްދަވާކަން އިއުލާން ކުރައްވާފައި ވަނިކޮށް ގައްސާން އެކްސްގައި ވިދާޅުވީ ޕީޕީއެމް އޮތީ ރައީސް ޑރ. މުއިއްޒުއާ އެކު ކަމަށެވެ.

ގައްސަން މައުމޫން އަކީ ރައީސް ޔާމީން އަށް ބޮޑުބޭބެ ވިދާޅުވާ ބޭފުޅެކެވެ. އަދި ރައީސް ޔާމީންގެ ވަރަށް އަރިސް ބޭފުޅެކެވެ. ރައީސް ޔާމީންގެ ވެރިކަމުގައި ގައްސާންގެ ބައްޕާފުޅު އަދި ރައީސް ޔާމީންގެ އެއްބަފާ ބޭބޭފުޅު ރައީސް މައުމޫން ޖަލަށްލެއްވި އިރު ވެސް ގައްސާން ހުންނެވީ ޔާމީންއާ އެކު އެވެ.

ގައްސާން ވިދާޅުވީ ޕީޕީއެމް އޮތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ އެކު ކަމަށާއި ރައީސް މުއިއްޒުގެ ސަރުކާރުގެ ހިމާޔަތުގައި އަތާއި އަތް ގުޅަލައިގެން ކަމަށެވެ.

ރައީސް މުއިއްޒުގެ ސަރުކާރުގެ ހިމާޔަތުގައި ސަފުތަކުގައި ކެރުމާއި އިހްލާސްތެރި ކަމާ އެކު ސާބިތުވެ ހުރެ ގައުމަށް ހެޔޮ އެދޭ އެންމެހާ ލޮބުވެތި ދިވެހިންނަށް ރައީސް މުއިއްޒު އާއި އެއްކޮށް ކުރިއަށް ދިއުމަށް ގޮވާލައްވާ ކަމަށް ގައްސާން ވިދާޅުވި އެވެ.

ރައީސް މުއިއްޒު ވެރިކަމަށް ވަޑައިގެންނެވިތާ ހަފްތާއެއް ނުވެ ރައީސް ޔާމީން ކުއްލިއަކަށް ޕީޕީއެމް އިން ވަކިވެވަޑައިގެންނެވުމަކީ ގިނަ ބަޔަކަށް ލިބުނު ހައިރާން ކަމެކެވެ. އެހެން ނަމަވެސް ރައީސް މުއިއްޒު އިންތިހާބުވެވަޑައިގެންނެވި ފަހުން ރައީސް ޔާމީން އާއި ޕީޕީއެމް/ޕީއެންސީ ލީޑާޝިޕްއާ އޮތް ގުޅުން ކެނޑިފައިވާ ކަމަށް ވަނީ އަޑު ފެތުރިފަ އެވެ.

ރައީސް ކަމަށް އިންތިހާބުވެވަޑައިގަތް ފަހުން ޔާމީންގެ ފޯންކޯލްތަކަށް ޑރ. މުއިއްޒު ޖަވާބު ވެސް ނުދެއްވަ އެވެ.

ޔާމީން ޕިޕީއެމް އިން ވަކިވެވަޑައިގަންނަވަން ޖެހުނީ އެމަނިކުފާނުގެ މަޝްވަރާ އާއި ލަފާ އެ ޕާޓީގެ ލީޑާޝިޕްގެ ބޭފުޅުން ބޭނުންނުކުރާތީ އެވެ.